Претходен број

Никој веќе не сака да штеди во денари

Депозитите повлечени во март, во април биле вратени во банките, но во евра

Соња Маџовска

Никој веќе не штеди во денари. Се' повеќе граѓаните и фирмите ги претвораат депозитите во евра. Тие и во април ги префрлале своите денарски влогови во девизни, иако за нив добиваат двојно пониски камати. Во април девизните депозити се зголемени за 40 милиони евра, на сметка на денарските депозити.

Сепак, факт е дека повлечените штедни влогови во март, особено пред изборите, кога беше присутен најголем страв од девалвација на денарот, во април повторно се вратени во банките. Но, факт е и дека сите повлечени депозити, вратени во банките, се претворени во девизи.

Тоа го потврдуваат последните податоци на Народна банка на Македонија, во кои се прикажани состојбите со штедните влогови во април, споредено со претходните месеци. Според овие податоци, вкупните депозити во април изнесувале 2,84 милијарди евра, што е за 30 милиони евра повеќе во однос на март. Априлското ниво на депозити е речиси идентично со тоа во февруари.

Интересно е тоа што повлечената заштеда од 30 милиони евра во март, е целосно претворена од денари во девизи, но има уште плус 10 милиони евра како нови заштеди, кои граѓаните во април ги вложиле во банките во цврстата европска валута. Така, денарските депозити во април изнесувале 1,34 милијарди евра, а девизните 1,49 милијарди евра. Во март, пак, денарските депозити изнесувале 1,35 милијарди евра, а девизните 1,45 милијарди евра.

Експертите сметаат дека стравот од девалвација на денарот граѓаните ги тера да ги претвораат денарите во девизи.

Според НБМ, минатиот месец имало забавено намалување на девизните резерви, а намалени биле и интервенциите на девизниот пазар кои, пак, во март, на дневна основа, се движеле од 500.000 до 2 милиона евра. И од НБМ и од Владата се децидни дека девалвација нема да има и оти граѓаните не треба панично да ги менуваат денарите. Сепак, и во последниот квартален извештај на НБМ се вели дека македонските граѓани сакаат парите да ги чуваат повеќе во евра, отколку во денари.

„Се' поголемото продлабочување на глобалната криза придонесе за натамошно влошување на очекувањата на домашните субјекти, манифестирани преку поголема наклонетост за располагање со странска валута, како форма за заштита од евентуалните ризици. Тоа се одрази врз остварениот нето-откуп на менувачкиот пазар, кој во првото тримесечје од годината оствари годишен пад од околу 45 отсто, укажувајќи на насоката на промена на приватните трансфери“, се вели во последниот квартален извештај на НБМ.

Во извештајот е наведено и дека кај нето-приливите од приватните трансфери се очекува натамошно намалување до крајот на годинава, а се очекуваат нето-одливи и врз основа на исплатена дивиденда кон странските инвеститори.

Врз основа на тоа, се очекува дефицитот на тековната сметка да се зголеми за 29,3 отсто на годишна основа, а ќе изнесува 13,8 отсто од проектираниот БДП, при што товарот за негово финансирање ќе падне врз девизните резерви.