Битка за профитот од српскиот кич

На пазарот најмногу се води битката околу емитувањето на српските емисии

Светлана Унковска

Влезот на српската медиумска групација „Пинк“ на македонскиот пазар ќе предизвика големо влијание врз гледаноста на домашните телевизии. Публиката, која досега некои од забавните емисии и реални шоуа ги гледаа на каналите на националните телевизии, во иднина ќе продолжат да ги следат на програмата на новата телевизија Пинк 15.

Се чини дека најпогодена ќе биде А1 телевизија, која го емитува реалното шоу „Фарма“, што е во директна продукција на „Пинк“.

Од друга страна, експертската јавноста реагира на се' поголемиот наплив на српска продукција и вели дека е згрозена поради несериозниот однос не само на власта туку и на самите медиуми, кои на своите програми повеќе имаат српска програма отколку македонска.

Сопственикот на оваа медиумска групација, Жељко Митровиќ, на завчерашната прес-конференција откако обзнани дека ја купил К-15 телевизија, најави дека на новата телевизија, покрај тоа што ќе продефилираат познатите ѕвезди на „Гранд“, гледачите ќе можат да го следат и реалното шоу „Фарма“.

Она што останува непознато е под кои услови матичната продукција ќе ја префрли на Пинк 15. Програмскиот директор на А1 телевизија, Анета Кочишки, не сакаше да одговори дали имаат најави дека договорот ќе биде раскинат или, пак, временски истекува.

„Жал ми е, но вашите прашања се во доменот на деловна тајна. Не можеме да ви дадеме никаков одговор“, кратко ни изјави Кочишки, која не сакаше ниту да даде оцена како во телевизијата гледаат на влегувањето на Пинк на медиумскиот пазар и дали очекуваат дека тоа ќе ја загрози нивната гледаност.

Директно загрозена не се чувствува Сител поради тоа што тие не емитуваат ниту една од емисиите што е во продукција на „Пинк“ или на „Гранд“. Но, и на оваа телевизија со национална концесија голем број од емисиите се во српска продукција.

„Моментално немаме никаква врска со Пинк. Реалното шоу ’Преживеани‘ е на „Вида медија“, а другите емисии се на ’Ендемол‘, ’Емоушн‘ и уште некои други српски продукции“, вели Игор Мурговски, од програмскиот сектор на Сител телевизија.

На пазарот на конкуренција, кој сега уште повеќе се разгорува, најмногу се води битката околу емитувањето на српските емисии, најмногу на на А1 и на Сител. Неодамна во интервју за една телевизија експремиерот Љупчо Георгиевски рече дека ваквиот наплив на српска продукција сериозно го загрозува македонскиот национален идентитет.

„На национален план актуелната влада води една чудна политика под плафонот и платформата дека тие се најголеми бранители на македонскиот национален идентитет. Она што јас постојано го зборувам е што, за жал, ние денес се соочуваме со најголемата рејугословенизација на македонскиот идентитет“, истакна Георгиевски.

И експертската јавност жестоко реагира на ваквиот тренд наместо да се негува македонскиот национален идентитет, што е основна функција на медиумите, се' повеќе на програмата да имаме српска програма.

„Тоа е србизација, враќање на југословенското и тоа е против основната функцијата на медиумите. Македонија се наоѓа во време кога се' уште не е решено македонското национално прашање, а медиумите треба да бидат двигатели и одраз на промените во општеството. Но, од она што сега се случува, јас се згрозувам и за мене претставува срам. Тоа е немање свест и професионализам на луѓето што работат во медиумските куќи и она што го гледаме е девалвација на нивното постоење“, реагира Лилјана Силјановска, професор по комуникологија на Универзитетот на Југоисточна Европа. (Св.У.)