Конфискацијата на земјиштето спорна за Уставен

Подносителот на иницијативата, Мирослав Грчев, задоволен од судската постапка

За уставните судии нема дилема дека е незаконски да се конфискува земјиште на кое е изграден објект без соодветно одобрение. Судот вчера поведе постапка за членовите 138 и 140 од Законот за градба донесен минатата година, кои и' дозволуваат на државата да ги одземе објектот и земјиштето под него во случај кога ќе биде констатирано дека се гради без градежна дозвола.

Судот ја поведе постапката затоа што овие законски одредби овозможуваат да биде одземена и сопственоста над земјиштето и над објектот што е изграден во рамките на одобрението за градење, со што се доведува во прашање уставно загарантираното право на сопственост и се создава правна несигурност кај граѓаните.

До Уставниот суд имаше поднесено неколку иницијативи за утврдување на уставноста на двата члена од Законот за градба. Меѓу подносителите беше и професорот Мирослав Грчев. Тој е задоволен од поведената постапка. Сепак, според него, конечната одлука дали одредбите ќе бидат поништени или укинати, нема некое големо значење од практичен аспект, бидејќи, како што појаснува, Законот во овој дел и досега не се применуваше, што само по себе покажува колку бил неприменлив.

„Нема дилема за епилогот од постапката, бидејќи ова значи дека Уставниот суд утврдил основаност за оспорување на законитоста и уставноста на одредбите. Добро е што Законот во овој дел беше неприменлив, па досега нема направено никакви штети, но постојат иницијативи поднесени до Уставниот суд, чие одлагање за решавање остава простор за последици со несогледливи штети“, вели Грчев.

Спорните членови 138 и 140 од Законот за градење предвидуваат кога инвеститорот гради или изградил објект спротивно на одобрение за градење, градежниот инспектор да донесе решение со кое во катастарот се запишува дека објектот и земјиштето под него се залог во корист на државата или општината. Истовремено определуваат и пенали во вредност од три проценти од вредноста на објектот, кои инвеститорот ќе ги плаќа се' додека не ја усогласи градбата со одобрението за градба. Доколку, пак, три месеци последователно не се плаќаат пеналите, може да се изврши промена во катастарот на сопственост и заложното право да се трансформира во право на сопственост од страна на државата и на општината. Пеналите се наплатуваат присилно според Законот за извршување. (Б.А.)