Претходен број

Со полиција иселено седиштето на ЛДП

Иселувањето било поради долг од 9.000 евра. Лидерот на ЛДП ја обвини власта дека се пресметува со опозицијата

Жаклина Хаџи-Зафирова

Со полициско обезбедување, вчера уште од раните утрински часови почна иселувањето на партиското седиште на Либерално-демократската партија на бул. „Партизански одреди“ број 2. Од седиштето на партијата, кое последниве години се наоѓа на оваа адреса, вчера во пладневните часови беше изнесуван целиот инвентар од просториите. Полицајците вчера не дозволуваа никој да влезе во седиштето на ЛДП, а нивното образложение е дека местото се обезбедува и дека отсекогаш било обезбедувано.

Лидерот на ЛДП, Јован Манасиевски, вчера обвини за класична пресметка со опозицијата. Според него, како образложение за иселувањето од страна на Јавното претпријатие за станбен и деловен простор било објаснето дека тие имаат неплатени сметки за закупнина за просторот за два месеца, иако ЛДП тврди дека ги платиле. Во Јавното претпријатие најостро ги отфрлаат обвинувањата од страна на ЛДП дека станува збор за политичка пресметка, тврдејќи дека во прашање е долг од 9.000 евра што ЛДП го платила откако бил раскинат договорот за закупнина, а случајот завршил кај извршител.

„Продолжува срамотењето на Македонија по најтешките избори полни со насилство. Груевски продолжува со пресметки со опозицијата. Станува збор за класичен насилнички обид, во одреден дел пресметка со опозицијата, а дел, според гласиштата, овој простор многу им се бендисал на членовите на т.н фамилија. Очигледно не можат да се воздржат, и првиот ден по изборите преземаат вакви насилнички мерки“, рече првиот човек на ЛДП, Манасиевски. Тој објасни дека утрината во седиштето на партијата дошол цел одред униформирани и полицајци во цивил, што, според него, „се првите сигнали за засилениот авторитарен режим што ќе треба да го трпиме во наредните четири години во Македонија“.

Манасиевски тврди дека во моментот на иселување тие немале ниту еден денар долг кон претпријатието. „Кон крајот на минатата година, вели тој, имале долгови за два месеца, но тие се исплатени во јануари“. Тој уште додаде дека Јавното претпријатие за стопанисување со станбен и деловен простор уште има важечки договор со партијата за користење на просторот што трае уште еден месец. „Од друга страна, има над 200 корисници на деловен простор кои имаат заостанати долгови меѓу 2 и 6 месеци, а Јавното претпријатие не презема мерки против нив“, потенцираше Манасиевски, кој за настанот ги известил странските мисии во земјава.

Лидерот на ЛДП ја обвини власта дека се служи со незаконски решенија, кои преку нивните партиски институции им служат како покритие. „Трет ден како ниту еден западен лидер не му ја честита победата на Груевски, иако таа е недвосмислена. Ако продолжи вака, никој нема да му честита. Многу ми е жал што голем број граѓани гласаа за Груевски, а со вакви потези ќе бидат разочарани од ваквата политика што ја води ВМРО-ДПМНЕ“, рече Манасиевски, кој најави дека ќе ја користат секоја прилика за да го демаскираат „авторитарниот режим на ВМРО-ДПМНЕ“.

Вчерашните обвинувања на лидерот на ЛДП, директорот на Јавното претпријатие за стопанисување со станбен и деловен простор, Ивица Коневски, ги нарече несериозни. „Ако се работеше за политичка пресметка со опозицијата, како што тврдат, тогаш требаше да го сториме тоа пред изборите, а не сега. Бевме многу толерантни“, изјави Коневски на вчерашната прес-конференција. Тој тврди дека не ги иселил досега поради разговорот со генералниот секретар на ЛДП, кој ги замолил да почекаат на завршување на изборите.

Според него, станува збор за неисполнување на обврските во договорот за закупнина со партијата, која уште минатата година била предупредена дека има заостанат долг за четири месеци. „Се работи за долг од повеќе од 9.000 евра за кој ги известивме на 14 јули 2007 година, барајќи од нив да го намират долгот. Вториот пат ги известивме за раскинување на договорот на 22 јануари годинава и го дадовме случајот на извршител“, вели Коневски.

Тој вели дека е точно дека ЛДП не должат ниту денар на претпријатието, но долговите ги платиле откако договорот веќе бил раскинат. Според него, законот му дозволува на претпријатието да преземе мерки ако не се платени повеќе од две закупнини за простор што е во владение на државата.