Претходен број

Поглед

Мистериозни камиони

Билјана Ангеловска

Трите камиони со сомнителна пратка од Косово и натаму се на граничниот премин Блаце. Очигледно Македонија тешко се справува со проблемот, бидејќи веќе четири дена не може да најде начин како да се ослободи од несаканиот товар. Дека работата не само што не е едноставна, туку и од ден на ден се усложнува, потврда е завчерашната интервенција на Итната медицинска помош, кога десет полицајци од Блаце се пожалиле на проблеми со дишењето. За среќа, без посериозни последици.

Меѓутоа, проблемот и натаму останува. И покрај напорите на македонските власти да постигнат некаков договор со своите косовски колеги, тоа очигледно тешко се реализира. Од вчера, граничниот премин дури е затворен за секаков вид моторизиран сообраќај. Ова уште повеќе доведува до шпекулации меѓу граѓаните. Иако надлежните се обидуваат да го уверат народот дека (засега) нема никаква опасност, сепак, конспиративноста што го следи целиот случај не остава многу простор за верување. Навистина, кога се работи за чувствителни теми, не треба да се создава паника и информациите кои доаѓаат до јавноста треба да бидат умерени и со дозирана тежина. Но, сигурно дека затвореноста на институциите во конкретниов случај, а особено концентрирањето на информациите само кај еден човек, портпаролот на Владата Ивица Боцевски, придонесува за недоверба и поголем страв кај граѓаните.

Тоа дека нешто итно мора да се преземе веќе им е јасно на сите. Превезот на тајноста се чини е искинат, па оттаму е потребно Владата отворено да соопшти какви се идните чекори на македонската држава. Само така ќе ги прекине шпекулациите и, што е најважно, ќе ја намали тензијата и ќе ги смири граѓаните.