На Скопје му треба промена со нови форми
„Сивилото и еднообразноста на Скопје треба да се промени со нови форми, со шаренило и разиграност на формите и ликовно обликување“ е ставот на Елизабета Аврамовска, ликовен уметник и професор на Архитектонскиот факултет, изнесен на вчерашната работилница „Ликовно обликување на градот“, што е дел од проектот „Скопје - метропола“. Аврамовска смета дека бојадисувањето на зградите не претставува уметност и дека е потребно да се размисли на кој начин и со кој објект или инсталација ќе се промени градот.
Според Љубиша Никодиновски - Биш, уметнички директор на МОТ, Скопје има десетина објекти кои претставуваат примери за добра архитектура, како што се Филозофскиот факултет, Факултетот за ликовна уметност, Музејот на современата уметност. „Но, има и недовршени комплекси, како Македонската опера и балет и Транспортниот центар, кои се, исто така, добри решенија, но треба да се дообликуваат. И Градскиот парк, според проектот, бил замислен како Дизниленд, но сега во него остануваат скршени мостови“, истакна Никодиновски.
Ставот на студентите-учесници на работилницата е дека на Скопје му недостасуваат слободни катчиња за интеракција и дружење меѓу младите. Тие потенцираа дека одредени скулптури поставени во центарот на градот имаат негативна симболика и не припаѓаат на просторот. (С.Н.) |
