Кумановци ќе се греат на природен гас
КУМАНОВО - Постојат реални шанси од наредната грејна сезона повеќе институции во Куманово да користат гас како греење. Гасоводниот систем регистриран како Јавно претпријатие „Куманово - гас“ ќе има 150 километри примарна и секундарна гасоводна мрежа. Досега се изградени првите десет километри, а до крајот на идниот месец се очекува да се изгради и главната мерна станица, по што ќе може да се приклучат првите корисници на природен гас.
Први корисници на природен гас во Куманово ќе бидат Домот за стари лица „Зафир Сајто“, детската градинка, две основни училишта, локалната самоуправа, поштата, судот и полицијата, но и други државни институции и приватни компании лоцирани по должината на првата делница од гасоводната мрежа на Куманово.
„Стручна екипа на компанијата ФЗЦ ’11 Октомври‘ направи пневматско испитување на делницата инсталирана досега на примарната мрежа. Надлежниот државен инспекторат за садови под притисок издаде решение за исправност на поставениот цевковод. Следува изградба на главната мерно-регулаторна станица со приклучок, што е законска обврска на компанијата ГАМА. Доколку станицата биде изградена во предвидениот рок, веќе од септември на природен гас може да се приклучуваат првите корисници во Куманово“, најавува директорот на ЈП „Куманово - гас“, Момчило Мирчевски.
Трета година едноподруго во Куманово интензивно напредува гасификацијата, што се смета за проект на деценијата. Ова е една од капиталните инвестиции, која е вредна 10 милиони евра, што се финансира од општинскиот буџет, а најголемиот дел средства се очекуваат од банкарски извори и од граѓаните како идни корисници на природниот гас. Работите на примарната и секундарната мрежа ги изведува екипа на Фабриката за заварени цевки и профили „11 Октомври“, која има повеќедецениско искуство во изградба на гасоводи и нафтоводи на европскиот пазар и ��а пазарите на Блискиот и Далечниот Исток. (Ст.Б.) |
