ПИТЕР ЏЕКСОН

Режисерот прогласен за витез

Режисерот на филмската трилогија „Господар на прстените“, Питер Џексон, прогласен е за витез на церемонијата во Велингтон, главниот град на Нов Зеланд. Одликувањето му го врачил шефот на државата, генералниот гувернер, сер Ананд Сатјананд, во име на британската кралица Елизабета Втора. Титулата витез му е доделена за придонес на уметноста на Нов Зеланд.

Џексон ја примил оваа почест, заблагодарувајќи им се на сите луѓе што му помогнале да снима филмови.

„Снимањето филмови не е соло-напор. Во тоа се вклучени стотици, илјадници луѓе, па ова одликување го примам во името на целата индустрија“, навел режисерот. Џексон ја започнал кариерата работејќи на нискобуџетни филмови, а се вивна во холивудскиот врв со трилогијата „Господар на прстените“, според романите на Џ.Р. Толкин. Последниот филм од серијалот освои 11 „оскари“, а Џексон потоа го сними римејкот на „Кинг Конг“ и неодамна „Прекрасни коски“.