АКАДЕМИЈА ИТАЛИЈАНА

Македонските манекенки повторно во Фиренца

Минатата недела дваесетина манекенки од Македонија учествуваа на модната ревија на Академија Италијана во Фиренца, Италија. Тие заедно со своите колешки од Италија претставија над 150 модели од студентите на Академијата во Фиренца, Рим, Бангкок, Шангај и во Скопје. Ова спектакуларно модно шоу се одржа во театарот „Сашол“ во Фиренца во фантастична атмосфера, со присуство на околу 2.000 луѓе во публиката. Во публиката како специјални гости присуствуваа светски познатиот моден дизајнер Џон Ричмонд, Москино, Џејмс Ејвори - режисерот на филмот „Соба со поглед“ , кои добија специјални признанија лично од директорот на Академија Италијана, Винченцо Џуба. Делот на ревијата на кој се претставија студентите од Македонија (трета година едноподруго), беше испратен со голем аплауз и одобрување.

Нашата екипа, составена од студентите - Јована Филиповиќ, Младен Цветков, Искра Џокиќ и манекенките од модното студио „Црнокрак“, од „Макмоделс“, од „Моделс ин“, од „Пантер моделс“ и од „Њу лук“ беа предводени од директорката на Академија Италијана - Скопје, Јасмина Митева, и од сопственикот на модното студио „Црнокрак“, Мики Црнокрак.