Евтин бостан на скап простор

Продавачите ги паркираат камионите и тракторите под дебелите сенки на дрвјата, а под нив ручаат и преспиваат

Снежана Калабакова

Дињи и лубеници, полни вреќи со кромид и картонски кутиии со пиперки, гајби со праски и домати ги преплавија парковите по населбите, тротоарите и дел од коловозите на сообраќајниците. Евтин бостан се продава на скапиот градски простор без никаков проблем. Продавачите своите полни камиони и трактори ги паркираат под дебелите сенки на дрвјата, а под нив на ќебиња ручаат и преспиваат во попладневните часови. На крајот од продажбата, во тревниците и на тротоарите остануваат скапаните парчиња овошје и зеленчук, корупки од лубеници и дињи и што ли уште не.

Продажбата од камиони во населбите е речиси редовна појава како во лето, така и на есен. Овие продавачи се грижат за тоа што повеќе да продадат, а при тоа не водат сметка за нередот што го прават во урбаните средини и не им е важно каде ги одложуваат прехранбените производи.

Од Пазарната инспекција велат дека нивните инспектори секојдневно се движат низ градот и спроведуваат акции за казнување во рамките на нивните ингеренции. Ваквите трговци можат да ги казнат само по основ на нерегистрирана дејност, а казната за тоа е 400 евра. Одземањето на прехранбените производи заради несоодветен начин на продажба надвор од зелените пазари е во ингеренции на Дирекцијата за храна.

Пазарната инспекција Во последниов квартал од годинава Пазарната инспекција поднела 170 пријави, односно, изрекла толку казни против лица што вршат продажба на прехранбени производи на нелегален начин. Реализирани акции имало во Аеродром и во Кисела Вода. Но, освен Пазарната инспекција, право да казнуваат имаат и општинските редари и комунални инспектори, а според Законот за јавна чистота казната за оние што оставаат зад себе смет од остатоци од храна е 50 евра. Непрописно паркираните камиони и трактори, пак, може да ги казни и сообраќајната полиција.

Ѕвонко Смиљков, комунален инспектор во Општината Ѓорче Петров, тврди дека во последниве седум дена биле казнети седуммина продавачи од камиони и трактори. Најпрвин биле опоменети, а потоа и казнети. Минатата година, вели тој, имале случај кога еден ист продавач бил казнет пет пати и на крајот морал да си оди. Законот е донесен пред повеќе од три години и токму затоа мора да се казнува. Се прават и координирани акции со пазарната инспекција и полицијата.

„Нашите ингеренции околу продажбата на прехранбени производи од камиони и трактори се само во однос на тоа што овие продавачи немаат регистрирано трговска дејност. Тие главно треба да бидат предмет на опсервирање на локалните власти, односно на општинските комунални инспектори и на сообраќајната полиција заради непрописното паркирање на своите возила. Токму затоа во соработка со нив често правиме координирани акции и казнуваме, но ваквите продавачи од една веднаш се позиционираат на друга локација“, вели Елизабета Чингаровска, директорка на Државен пазарен инспекторат.