Пред прилепскиот Дом на култура ќе стојат имиња на заслужни граѓани

Прилеп ги одреди првите 12 заслужни прилепчани, чии имиња ќе се најдат на патеката на славните пред Домот на културата „Марко Цепенков“. Со одлука на Советот на општината на патеката на славните ќе бидат впишани имињата на прилепските дејци од културата: Марко Цепенков, Блаже Конески, Круме Кепески и Стале Попов (од литературата), Борко Лазески и на Ѓорѓи Ачески- Аче (од ликовната дејност), Атанас Бадев и Пеце Атанасоски (од областа на музиката), а од големите прилепски и македонски актерски доајени ќе се најдат имињата на Нада Гешоска, Илија Џувалековски, Дарко Дамески и на Илија Милчин. Во иднина на таа патека ќе се најдат имињата на вкупно 62 прилепчани, кои со своите дела ги задолжиле градот и државата.

Патеката на славните е дел од арт- плоштадот во центарот на градот, чија првата фаза беше поставена голема шаховска табла. (МИА)