СТИЛ
Лозова ВС - за уживање со стил
Лозовата ракија е добиена од гроздов дестилат, стареен во дабови буриња не помалку од три години
Енолозите, хемичарите, биотехнолозите... можат да ви дадат вистински стручни објаснувања, поткрепени со формули и со емпириски докази, но од обичните лаици до докажаните мераклии сакаат да ја ценат ракијата по муабетот и дружбата што произлегува од неа. Но, ако во виното е вистината, според новите тенеденции, вкусови и  табиети на консументите, во ракијата би требало да биде стилот. Обидувајќи се да ги спои вкоренетите мераци и модерната потреба за стил, винаријата "Тиквеш" минатата недела на пазарот лансираше лозова ракија со ознаката ВС ("вери спешл" - исклучително посебна), што во светски рамки се употребува најчесто за назнака на квалитетот на француските коњаци, италијанската грапа или англиското бренди.
Оваа ракија е добиена од гроздов дестилат, стареен во дабови буриња не помалку од три години - процес кој е еден од критериумите заслужен за довивање на квалификацијата ВС.
- Со лансирањето на ракија која ја носи ознаката ВС го продолжуваме трендот на надградба на квалитетот започнат со врвните вина од сериите: "спешл селекшн", "лимитед едишн" и "александрија куве". Овојпат напорите за постигнување врвен квалитет ги насочивме и кон сегментот жестоки пијалаци, целосно почитувајќи ги традицијата, знаењето и искуството што го има ВВ "Тиквеш" во производството на гроздова ракија, комбинирајќи ја со современтите светски трендови и вкусови - кажува Сашо Велков, менаџер за извоз на винарската визба "Тиквеш" за мотивите и предизвиците за создавање на новата лозова ракија во нивниот асортиман.
Додека жестоките пијалаци - како бренди, коњак, виски - имаат житно потекло и повеќе се третираат како дижестиви ( за по јадење, за варење на храната), ракијата - традиционално е аперитив, за отворање на апетитот. Новата ракија на "Тиквеш", според многу нејзини карактеристики, е уникатен жесток пијалак, и поради јачината од 45%, вообичаена за ВС-пијалаците, но различна од другите традиционални ракии на македонскиот пазар, кои се со јачина околу 40 %.
- Трендовите на клучните светски пазари покажуваат дека во поново време се создава простор за пријатни изненадувања и во сегментот на гроздовите дестилати. Тука ја гледаме нашата шанса - со ракија која е произведена на природен начин, од висококвалитетно грозје и која ја достигнала својата зрелост во дабови буриња - вели Велков.
Карактеристиките и амбициите при создавањето на оваа лозова ракија наметнуваат нов начин на нејзино консумирање, што не го исклучува традиционалното мезење со салата, но и како дижестив за релаксирано уживање со стил. (Ј.П.) |
