Албанските рибари ни ги сотреа пастрмките

Албанските рибари си ловат ли си ловат пастрмки од Охридско Езеро. Во време на тотална забрана за риболов на македонскиот дел од езерото, на албанска страна се ловат тони пастрмка. Осум месеци годишно рибарите од Албанија слободно, со повеќе од сто кајчиња, го загрозуваат рибниот фонд на езерото.

Само во текот на мрестот е воведена забрана за лов на пастрмката и на белвицата. Албанската влада најавува поригорозни контроли од страна на инспекторите за рибарство и воведување повисоки казни.

„Мислиме дека ако стигнеме да имаме заедничка администрација за Охридското Езеро, ќе најдеме решение за сите проблеми што ги има езерото и сливното по��рачје“, изјави вчера Аријан Мероли од Билатералниот секретаријат.

„Се' уште стојам на ставот од пред неколку години дека се' додека не се даде езерото на управување под концесија, ние ќе се соочуваме со овие проблеми“, вели Дејан Паноски од Билатералниот секретаријат.

За уловени 1.060 мрежи годинава, од страна на граничната полиција биле поднесени само пет кривични пријави. Според спортските риболовци, токму тоа е и причината зошто во Охридското Езеро царува рибокрадството.

„Од албанска страна рибокрадците ловат, но доаѓаат и во македонскиот дел од езерото до Трпејца. Фрлаат мрежи за плашица на длабочина од 70 метри, при што ловат мали пастрмки. Рестораните во Албанија се преполни со мали пастрмки“, вели Радован Димитриески, претседател на СРК „Св.Апостол Петар“. Во земјава е воведена тотална забрана за риболов, но, сепак, речиси во сите охридски ресторани се наоѓа пастрмка на црно. (Д.Р.)