Десетгодишна ученичка од Скопје победник на натпревар на Европската комисија

Цртежот на Тијана Додов придонесува за подигнување на свеста за важноста на родовата еднаквост во ЕУ

Младата Тијана Додов од Скопје е една од победниците на меѓународниот натпревар за цртање на тема „Родова еднаквост“ во организација на Европската комисија. Десетгодишната ученичка од скопското училиште „Јан Амос Коменски“ е една од 14-те победници меѓу 49.709 пријавени ученици на годинашниот натпревар на Комисијата во чест на Меѓународниот ден на жената и единствен победник од балканските држави. Како што се наведува во официјалното соопштение на Комисијата, изборот го направила комисија од 50 деца од Европското училиште во Брисел.

Додов и другите победници ќе бидат наградени со 1.000 евра, а се очекува парите да бидат искористени за купување книги, компјутери и други едукативни материјали. Во натпреварот учествувале ученици од 61 држава, меѓу кои од Африка, Азија, Латинска Америка, медитеранските држави, Блискиот Исток и државите од Југоисточна Европа и од Балканот. Цел на натпреварот била преку цртеж децата на возраст од осум до десет години да ги изразат своите гледишта за родова еднаквост и на тој начин да придонесат за подигнување на свеста на младите за промена и подобрување на ситуацијата на жените во општеството. „Доколку креаторите на политиките работат на поефикасни политики тогаш овие деца може да бидат оние што во практика ќе ги реализираат“, истакна патронот на овогодишниот натпревар, Андре Пиебалгс, еврокомесар за развој. Делата од натпреварот ќе бидат изложени во Музејот за деца во Брисел од 9 до 26 ноември. (Н.Р.)