Претходен број

Поглед

Заштитени со закон

Оливера Војновска

За сите македонски граѓани 2 јануари е работен ден, освен за пратениците. Тие ќе ги спојат сите државни и верски празници - Нова година, Бадник и Божик и ќе заборават на парламентот најмалку десетина дена. На работните места во Собранието треба да се вратат на 9 јануари за да ги финишираат уставните измени за намалување на цензусот за избор на претседател. Доколку не се премислат, бидејќи е Свети Стефан, а згора на тоа се паѓа во петок.

Македонските пратеници носат закони кои самите не ги почитуваат. На тој начин покажуваат дека за нив не важат истите правила како и за обичните смртници. Туку некои други, со кои тие како да се заштитени со закон!

Никој не реагира, ниту пратеници од власта ниту од опозицијата. Иако спојувањето на новогодишните и божикните празници (и не само тие) стана практика во парламентот, досега за тоа не слушнавме ниту збор од никого. Опозицијата пред две години жестоко ги критикуваше измените на Законот за празници и не ја гласаше новата листа на државни и верски празници. Опозицијата тогаш во знак на протест пред чинот на изјаснувањето ја напушти собраниската сала.

Сепак, празниците, веројатно, на сите ептен им се погодија. Некои од пратениците, изгледа, уште од вчера си го зедоа зимскиот одмор.

Можеби затоа ги немаше на свечената седница во парламентот на која се обрати претседателот на Големото национално собрание на Турција, Ќоксал Топтан. Тоа е апсолутно некоректно, во најмала рака невкусно и зборува за ниското ниво на култура на нашите политичари. За жал, дел од нив вчера заборавија на убавото однесување.Турција е голем пријател на Македонија и високиот гостин од Анкара не заслужи таков однос од домаќините.