„Телеком“ даде зелено светло, Владата ќе добие 38 милиони евра
Собранието на „Македонски телеком“ ја усвои одлуката за исплата на дивиденда за 2008 година во висина од 100 милиони евра, што претставува дел од севкупната добивка на компанијата во висина од 160 милиони евра пред оданочување. Од тие пари, Владата ќе добие 38 милиони евра, а освен неа и „Маѓар телеком“, дивиденда ќе добијат и малцинските акционери, кои во најголем дел се вработени и пензионери од телекомуникациската компанија.
Право на дивиденда за 2008 година имаат сите акционери што ќе бидат евидентирани во акционерската книга на телекомот на 8 мај, а ќе добијат по 72,42 денари по акција. Исплатата на дивидендата ќе почне на 22 мај. Последен ден на тргување со право на дивиденда за 2008 година е 5 мај, а прв ден на тргување без право на дивиденда за 2008 година е 6 мај.
„На годишното Собрание на ’Македонски телеком‘ се усвоени финансиските ревидирани и консолидирани финансиски извештаи на компанијата. Донесена е одлука за исплата на дивиденда во висина од 100 милиони евра за целата компанија. Од тоа, 38 милиони евра ќе и' бидат исплатени на Владата. На 22 мај ќе се исплати дивидендата на сите акционери“, изјави вчера Зоран Трајчевски, владин претставник во „Телеком“, по завршување на Акционерското собрание.
На вчерашната седница, Собранието го одобри и работењето на членовите на Одборот на директори на „Македонски телеком“ за 2008 година, при што е отповикан Волфганг Хауптман, како неизвршен член на Одборот на директори на „Телеком“, а за нов неизвршен член е избран Стефан Кербер.
Државата досега има добиено шест дивиденди од телекомот. Во 2001, 2002 и во 2003 година добиваше по 18,5 милиони евра, а во 2004 година речиси 2,5 пати повеќе, односно 44,8 милиони евра по едногодишно задоцнување, поради истрагата за финансиски малверзации. Дивидендата за 2005 година беше 48 милиони евра. За 2006 година немаше исплата, бидејќи акци��нерите одлучија дивидендата да ја префрлат во акумулирана добивка. Лани Владата доби 61 милион евра дивидендата за 2006 и за 2007 година. (А.С.) |
