Игор Џамбазов сведочеше за случајот со „План Б“
Осомничениот за изнуда му бил соработник на Џамбазов
Познатиот актер и водител рече дека станува збор за долг, а не за изнуда
Скопјанецот Александар Ристовски, осомничен дека од сопственикот на „План Б-продукција“ изнудил 500 евра, по неколкучасовен распит пред истражниот судија, си заминал дома, откако судијата донел решение за алтернативна мерка - куќен притвор.
Од извори блиски на истрагата дознаваме дека осомничениот Ристовски се бранел со зборовите дека сопственикот на „План Б-продукција“ должел одредена сума пари - и тоа нему и на познатиот шоумен Игор Џамбазов, со кого соработувал. Наводно, долгот настанал по еден од настапите на Џамбазов, за што требало да им бидат исплатени 500 евра. Ристовски појаснил дека сопственикот на продукциската куќа ги договарал настапите на Џамбазов, а за секој настап требало да им биде исплатен хонорар што бил однапред договорен, а износот што го надминувал договореното, му бил исплатуван на сопственикот на „План Б-продукција“.
Осомничениот не негирал дека во неколку наврати имал разговори со продуцентот околу неисплатениот хонорар и дека, наводно, му било одговарано дека не им должи ништо, бидејќи тој имал одредени трошоци поврзани со настапите. Имено, поради долгот од 500 евра дошло до прекин на соработката меѓу сопственикот на продукциската куќа и Џамбазов и Ристовски, од друга страна.
Нашите сознанија говорат дека сопственикот на „План Б-продукција“ не негирал дека постоеле одредени несогласувања околу барањето за доисплата на парите. Тој пред судот изјавил дека имал отворени закани од Ристовски, но исто така кажал дека средбата во кафе-барот „Дием“ бил по негов телефонски повик.
Од она што успеавме да го дознаеме, на Ристевски му биле дадени бараните 500 евра, но тој се согласил со сопственикот на „План Б- продукција“ дека треба да задржи одреден дел од парите што биле инвестирани како негов реален трошок за еден од настапите. Сепак, сопственикот на продукциската куќа се согласил неговиот дел да му биде исплатен во некоја друга прилика, но само малку подоцна, полицијата го уапсила Ристовски и кај него ги нашла претходно обработените 500 евра.
Пред истражен судија завчера, во својство на сведок, се појави и нашиот познат актер и ТВ-водител Игор Џамбазов. Од она што го изјавил тој пред истражниот судија може да заклучи дека навистина постоел должничко-доверителски однос, односно дека по неколкумесечна соработка со „План Б-продукција“ дошло до прекин на соработката, наводно, токму поради неисплатените 500 евра. (Љ.С.) |
