Вербална војна меѓу Скопје и Атина

Место да преговараат во Њујорк, македонските и грчките функционери вчера жестоко се препукуваа

Тонот меѓу Македонија и Грција видливо се заострува правејќи ги најавите беспредметни дека Генералното собрание на ОН ќе биде местото каде што ќе биде можна разврска на спорот за името. Место да се среќаваат и да преговараат, македонските и грчките функционери веќе два дена се препукуваат, при што Атина тврди дека премиерот Никола Груевски одбегнува средба во ОН, а Скопје дека надежите што ги ширела новата Влада на Јоргос Папандреу се лажни, бидејќи позициите со кои излегле во Њујорк се крајно радикални.

„Тоа е големо разочарување за сите нас и не оди во правец на конструктивно работење за изнаоѓање решение“, беше вчерашниот коментар на Груевски. Повторувањето на позицијата за ерга омнес, односно за име со географска одредница за севкупна употреба, ако е потребно и со промената на Уставот, според премиерот, покажува дека нема поместување кај грчката страна.

„Таквите изјави демантираат многу луѓе во Македонија, кои во повеќе наврати велеа дека Грција била флексибилна, а Македонија не“, оцени тој, додавајќи дека останува оптимист оти е можно решение, но дека оптимизмот не е доволен, туку е потребна конструктивност и од другата страна.

„Не знам колку ваквите ставови се во правец на подобрување на нивните позиции пред локалните избори. Тоа времето ќе го покаже. Но, ако навистина стојат на таквите позиции, тоа не е конструктивен став и нема да помогне за надминување на спорот. Ако навистина Грција опстојува на тој став, а се чини дека опстојува бидејќи по којзнае кој пат го повторува, тоа покажува нешто друго во однос на она што го декларираат, иако многумина во Македонија не сакаа да веруваат дека тоа го кажуваат. Од една страна, деклариират дека имаат волја, дека се конструктивни и сакаат проблемот да се реши, а од друга страна, излегуваат и кажуваат која е нивната позиција, а таа е крајно радикалната, можеби порадикална од онаа на претходната влада“, рече Груевски.

Серијалот оди или не во Њујорк продолжи и вчера, бидејќи премиерот повторно не кажа каква му е намерата. Тој негираше дека не сакал да се сретне со Папандреу, посочувајќи дека таква средба не ни била договорена. Затоа, пак, му упатил отворена покана на грчкиот премиер за средба во Македонија или каде било и кога било, доколку смета дека тоа би придонело за побрзо решавање на проблемот.

Изјавата на медијаторот Нимиц дека проблемот може да биде решен со дијалог меѓу раководствата на двете земји, за премиерот не значи дека тој се откажува од посредувањето.

„Не мислам дека крева раце, но укажува дека сите форми на комуникација се добри и ќе придонесат за надминување на овој проблем“, изјави Никола Груевски.

Тонот и вокабуларот што го употреби премиерот претходно ги најави претседателот Ѓорге Иванов во Њујорк, во обраќањето на Самитот за Милениумските развојни цели, што се одржува во рамките на 65. Генерално собрание на ОН во Њујорк. Тој направи политичко салто мортале, па сиромаштијата во земјата ја поврза директно со грчките блокади на Македонија.

„Има објаснување зошто е недоволен напредокот во овие сегменти. За многумина овде во оваа сала е чудно да слушнат дека причините за несоодветниот развој делумно треба да се бараат во постапките на една земја членка на ЕУ и на НАТО. За жал, морам да ви кажам дека Република Македонија е попречена во економскиот развој од својот прв сосед. Имаме наметнат проблем околу името на мојата земја, кој освен на политички план, ни создава сериозни импликации во економскиот развој, во привлекувањето странски инвестиции, нешто што може директно да ја намали сиромаштијата и невработеноста“, истакна Иванов.

„Факт е дека Грција е еден од најголемите инвеститори во Македонија, но исто така, факт е дека со блокадите во интеграциските процеси, индиректно ни се блокира привлекувањето на други инвеститори и инвестиции. Но, ние не сме обесхрабрени. Веруваме дека наскоро со нашиот сосед ќе најдеме решение што ќе ни ја обезбеди европската и евроатлантската иднина, а со тоа и благосостојба за нашите граѓани. Ние сме подготвени за тоа“, порача Иванов од говорницата ��о ОН. (Н.Р.)