И неделава се пријавува за најубаво новогодишно украсување

Градските власти информираат дека и неделава ќе трае пријавувањето за традиционалната манифестација „Новогодишните бои на Скопје“. Сите заинтересирани што сакаат да го презентираат она што го украсиле по повод новогодишните празници, а станува збор за украсување тераса или прозорец од стан, двор, излог на деловен објект или слично, тоа можат да го сторат со пријава на телефонскиот број 3297-265 најдоцна до петок.

Имено, Градот и годинава ќе додели награди и признанија за најубаво новогодишно украсен двор од индивидуална куќа, најубаво украсен прозорец или тераса од стан, најубаво украсен деловен објект (продавница, ресторан, кафуле), како и најубаво украсен двор на средно училиште и влез пред станбена зграда.

Најуспешните, кои ќе ги избере комисија составена од претставници од медиумите, Град Скопје ќе ги награди со вредни награди. Дел од наградите се ослободување од плаќање на сметката за потрошена електрична енергија за декември, производи од ковано железо и друго. (Дс.Т.)