Огромна побарувачка за росоманската праска

Бербата на праската во росоманскиот крај е во полн ек. Се очекува дека годинава од овој регион ќе се наберат близу 10 милиони килограми праска. Моментално се откупува сортата „ред хевен ерли“, а цената за килограм е од 20 до 30 денари. Производителите се задоволни од моменталната состојба, но, велат, секогаш е така со првите сорти, а подоцна цената паѓа многу пониско. Родот, според нив, годинава за разлика од лани е послаб поради променливото време, обилните дождови и слабото сонце, кои не и' одговараат на праската. Откупувачите, пак, се задоволни од квалитетот на годинашниот род и велат дека побарувачката е голема. „Да има уште 100 отсто поголема понуда на праски, нема да биде доволно. Странските трговци бараат многу поголеми количини отколку оние со кои располагаме моментално“, вели Владо Орданов, сопственик на претпријатието „Адо 95“, кое долги години работи и поседува ладилник за откуп на земјоделски производи. Росоманската праска се пласира претежно на пазарите на Романија, Хрватска, Русија, Белорусија и Украина, а трговците велат дека се забележува недостиг зашто побарувачката е огромна од странските пазари. Македонија годишно произведува 13 илјади тони праски, од кои две третини се од Росоман. (МИА)