Мислења

Благодариме господин Мико и збогум!

Слободан Најдовски

Предлагајќи прекинување на преговорите, Џејсон Мико не наведува во која насока ќе се движи Македонија

Oд почнувањето на преговорите за спорот со името со Грција, под покровителство на ОН, имало и предлози за прекинување на преговорите од наша страна. Но, тие предлози секогаш доаѓаа од групи или поединци кои немаа влијание во јавноста. Тие најчесто поаѓаа од позиција да предизвикаат внимание врз себе или, пак, поведени од емоциите ретко размислуваа за последиците од нивниот предлог. Затоа и не предизвикуваа посебно внимание во македонската јавност.

Имаше и предлози кои доаѓаа и од по некој наш поранешен дипломат, при што му се посветуваше поголемо внимание и анализа. Но, ако предлогот е од личности, советници на државни функционери или многу блиски на владата, тогаш тоа заслужува сериозна анализа и одговор бидејќи може да се смета и како опипување на пулсот на македонските граѓани за еден таков потег. Токму во таа насока може да се гледа и на колумната на Џејсон Мико во еден од весниците, која го содржи предлогот за прекинување на преговорите со Грција.

Џејсон Мико не е кој било колумнист за да може лесно да се помине преку неговите ставови по однос на Македонија. Поединци го сметаат како значаен лобист на нашата држава. Според кажувањата на претставници на ВМРО-ДПМНЕ, тој учествувал како советник во нивни изборни кампањи за што добил и финансиски надомест. Овој колумнист често пати можеше да се види и на изборните митинзи на владејачката партија. Оттука неговите ставови не се само обични ставови на еден колумнист, туку се ставови кои можат, а најверојатно имаат и силно влијание врз одредување на политиката на Владата, а со тоа и политиката на македонската држава. Господин Мико, кога е во Вашингтон, често разминувајќи се на улица со нашиот амбасадор, а можеби и често разговарајќи во нашата амбасада, сигурно има влијание на неговото однесување во решавање на нерационалниот спор со Грција.

Пишувајќи дека името и идентитетот се неделиви, неговиот совет е дека треба да се престане со лудилото и дека е „време за нов почеток“. Новиот почеток, споре�� него, „можеби е во прекинување на преговорите“ и дека не почнува се' со членството во НАТО и ЕУ, бидејќи тоа се клубови што секој ден имаат се' помалку и помалку вредности. Значи, крајниот совет на господин Џејсон Мико е прекинување на преговорите под покровителство на ОН и напуштање на нашата ориентација за евроатлантски ориентации бидејќи тие се распаѓаат. Тоа ме потсетува на учењето во претходниот систем дека вредностите на гнилиот капитализам ќе се распаднат и тогаш ќе дојде времето на благосостојба. Но, не се распадна гнилиот капитализам, барем уште во догледно време ќе опстојува, туку се распаднаа „прогресивниот социјализам и комунизам“.

Предлагајќи прекинување на преговорите, господин Мико во ниеден момент не размислува и не предлага во која насока ќе се движи Македонија. Лесно е господин Мико од аспект на граѓанин кој има слобода на движење во кој било дел на светот (не знам, можеби само во Северна Кореја е спречен да патува) да дели совети. Се запрашал ли зошто на македонските граѓани им треба рентгенски да го пресликаат своето досие за да добијат виза за да ги посетат своите роднини во САД, татковината на господин Мико. Која е гаранцијата дека ако само ние не станеме членка на ЕУ, нема повторно да ни се воведат визи и ќе ни треба да играме оро пред амбасадите на европските земји за да добиеме виза за да навиваме за нашата репрезентација во кошарка или ракомет, а да не зборуваме за бизнис или студирање во странство.

Дали господин Мико и сличните на него имаат одговор на прашањето за нашите економски перспективи доколку сме надвор од евроатлантските интегративни процеси. Само како напомена, Македонија нема пазар по големина ниту по структура кој би можело да биде еквивалентна замена за нашата интеграција во Европската унија. Кога би се прекинале преговорите, која е гаранцијата дека нема да се променат некои од меѓусебните односи на Македонија со ЕУ на полето на слободната економија. Многу брзо може да се променат и да се доведе во прашање владиниот адут за пазар од шесто и педесет милиони потрошувачи кој го нуди на евентуално заинтересираните инвеститори во Македонија.

Некои евроскептици веднаш ќе порачаат, што им недостига на две-три високо развиени земји кои не се членови на европскиот клуб. Ним не им недостига ништо, но нам ни недостига што нашето ниво на општествено-економски развој е на најдолни граници, а нашите природни ресурси не се ни оддалеку како на тие земји. Има уште илјадници аргументи против ставот на Џејсон Мико, но овде нема место за тоа.

Според Мико, името и идентитетот се повозвишена цел од членството во НАТО и ЕУ. Македонските граѓани, а и политичарите, се свесни за тоа и од тие причини донесувањето одлука е тешко. Свесни се дека во овој момент немаат спремност да се откажат нити од едното ниту од другото, бидејќи и двете вредности, името и евроатланските интеграции, котираат на врвот и со висок процент во секоја анкета. Точно е и тоа дека да седиш некаде безличен, па дури и во друштво при обично пиење кафе, е недостоинствено. Но да останеш сам, изолиран од околината е уште пострашно. Затоа способноста на политичарот не се состои во тоа да се тргне настрана, туку да изнајде начин како да влезе во друштвото, а да ги зачува личното достоинство и достоинството и квалитетите на своите граѓани.

Треба да се има предвид дека со политика на прекинување на разговорите сигурно ќе се охрабрат домашните деструктивни сили кои нашето евроатланско неинтегрирање можат да го искористат за предизвикување нестабилност. Прекинот на преговорите наместо да го означи крајот на лудилото има реални шанси да премине во почеток на ново лудило со непредвидлив крај на овој дел од Балканот.

Владата треба јавно да му искаже благодарност за советите и треба да му каже и збогум за такви предлози. Господин Мико е добредојден како човек, како граѓанин, но неговите размислувања на овој план не се прифатливи за нас. Не само на Џејсон Мико, туку и на кој било што ни советува прекин на преговорите, треба да им се каже благодариме за советите но тоа не е нашиот пат.

Наш интерес е не само да продолжиме со преговорит, туку да ја преземеме водечката улога во изнаоѓање решение за надминување на спорот.

(Авторот е поранешен пратеник)

Наш став



Објавувањето колумни и мислења од надворешни автори е одраз на намерата на „Утрински весник“ да биде моќен и влијателен глас на заедницата. Но, напоменуваме дека не се согласуваме секогаш со ставовите што ги изнесуваат некои од нашите колумнисти, особено кога станува збор за лични дисквалификации, етикетирања без основа и извртување на контексти со цел да се наштети на друга политичка личност или личност од која било сфера. „Утрински весник“ се оградува од таквиот речник и конотации и ги смета за непримерни во јавната комуникација.