Стојановски си замина - долговите останаа

Агенции од Австралија се закануваат дека ќе покренат постапки пред тамошните институции против Македонија

Повлекувањето на амбасадорот Перо Стојановски од функцијата покрена лавина од реакции во Австрали��а од страна на оние кои му верувале како претставник на Македонија, а сега не гледаат начин како да си ги наплатат долговите што, наводно за службени цели, ги правел низ агенции во земјата. Претставници на две туристички агенции вчера се заканија дека ќе покренат постапка пред австралиските институции, бидејќи на обидите да добијат објаснување и пари од нашата Амбасада во Канбера никој не одговарал, и уште повеќе - речиси една година никој не им кревал слушалка.

„Никој од Амбасадата не крева слушалка. Таа не функционира, иако од септември минатата година барам некој да ми одговори кога ќе ни бидат платени авионските карти што на име на Амбасадата ги подигаше амбасадорот Перо Стојановски“, изјави вчера претставничка на агенцијата „Глобал плус холидејс“.

Според неа, веќе дваесет и пет години работи во овој бизнис и не сретнала случај највисок дипломатски претставник на една земја да користи услуги и да не ги плаќа, што во Австралија се квалификува како финансиска злоупотреба и кривично се гони. „Планирам ова прашање да го изнесам во австралиската јавност и пред институциите“, најави таа додавајќи дека не е толку лута на Стојановски, колку на македонските институции кои си дозволиле да испратат непроверен кадар како нивен претставник.

Амбасадорот Стојановски на оваа агенција и' должел пари за неколку авионски карти, кои, како што се нагласува, редовно ги подигал под образложение дека му требаат службено за да присуствува на конгреси за кои не чуле во нашето МНР. Иако агенцијата одамна добила уверување од некој од вработените во Амбасадата дека случајот ќе биде проследен до Македонија, од септември наваму не добиле никакво известување.

И од агенцијата „Империјал травел сервис“ се жалат дека нема кому да се обратат за да си го наплатат долгот бидејќи никој од Амбасадата не одговара на телефон, инаку поплака што редовно може да се слушне од иселениците во Австралија според кои, и да им се посреќи некој да крене слушалка во Амбасадата во Канбера, редовно не им работи опремата за изработка на документи. И од оваа агенција најавуваат дека ќе се обратат за помош до австралиските институции, со напомена дека не се сами и дека има повеќе вакви случаи на погодени од долговите на амбасадорот.

Стојановски, по се' изгледа, позајмувал и пари на рака, а случај подготвуваат и две секретарки ангажирани во Амбасадата за кои биле испратени пари од Скопје, но тие никогаш не ги добиле како исплата. Од МНР неодамна преку изјава се оградија од долговите на амбасадорот, кој официјално сам си поднесе оставка на функцијата поради здравствени причини. Дали таквата ограда може да помине кај австралиските институции е друго прашање, а најважното е - може ли Македонија да си дозволи ваков меѓудржавен проблем со земја која држи до правните и дипломатски процедури? (С.Ј.)