Антимакедонски протести во Албанија

Група млади во центарот на албанскиот град Бурел по одржаниот протест го запалиле, газеле и фрлале македонското знаме. На протестот биле извикувани пароли „Долу Македонија“, „Сакаме етничка Албанија“. Група млади одржаа протест и пред македонската амбасада во Тирана. Овие протести се реакција на инцидентите што се случуваа последната недела во Скопје. Македонското Министерство за надворешни работи најостро го осудува инцидентот во Бурел, како и паролите и скандирањата со навредлива содржина пред македонската амбасада во Тирана.

„Инцидентите од овој карактер, проследени со пароли со говор на омраза, не одат во прилог на одличните добрососедски односи меѓу Македонија и Албанија и градење доверба меѓу двата народа“, стои во реакцијата од МНР. Очекуваме, се посочува во реакцијата од МНР, албанските власти да ги осудат овие инциденти, да превземат мерки за откривање на сторителите, како и соодветни мерки за спречување на евентуални инциденти од сличен карактер.