Да се урнат сите цркви на Арапскиот Полуостров

Големиот муфтија на Саудиска Арабија бара да се урнат христијанските храмови

Големиот муфтија на Саудиска Арабија изјави дека сите цркви на Арапскиот Полуостров треба да се урнат. Неговата изјава предизвика бес меѓу христијаните низ Блискиот Исток.

Големиот муфтија шеикот Абдул Азиз бин Абдула ја даде контроверзната изјава како одговор на прашањето на претставник на кувајтски невладини здруженија. Кувајтски парламентарец во февруари побара забрана за изградба на нови цркви, но до сега не доби поддршка од мнозинството застапници за тој предлог. Невладината организација Друштво за оживување на исламското наследство го праша големиот муфтија што велат исламските закони по тоа прашање.

Големиот муфтија, кој е највисок функционер на исламската религија во Саудиска Арабија, го цитираше пророкот Мухамед во делот дека на Арапскиот Полуостров може да постои само една религија. Потоа дојде до заклучок дека е важно за Кувајт, кој е дел од Арапскиот Полуостров, да ги уништи сите цркви на своја територија, пишува РТ.

Кувајтскиот застапник Осама ал-Мунавар на „Твитер“ во февруари напиша дека планира да предложи закон според кој би се урнале сите цркви во државата. Но, подоцна се откажа од таквиот радикален предлог, и кажа дека постојните цркви може да останат, но дека треба да се забрани изградба на сите свети објекти, освен оние муслиманските.

Друг застапник го поддржа и го изнесе аргумент дека во Кувајт има премногу цркви во однос на бројот на христијани. Во Саудиска Арабија сите религии освен исламот се забранети и не постојат цркви, иако на малото малцинство христијани теоретски им е дозволено дејствување и практикување на религијата во својот дом. (Индекс.хр)