Десетина насилници претепаа момче



Седумнаесетгодишно момче од Скопје било претепано од десет непознати напаѓачи, кои се во бегство

Тинејџерот се здобил со повреди и по укажаната лекарска нега е пуштен на домашно лекување. Како што соопшти полицијата, инцидентот се случил во средата околу 21 часот на раскрсницата од улиците „Лазар Трпковски“ и „Ѓорѓи Поп Христов“ кога големата група без повод и причина му се нафрлиле на малолетникот, удирајќи го со клоци и со тупаници.

Освен овој инцидент, полицијата информира за уште два случаи во кои се инволвирани ученици. Четиринаесетгодишно момче од тетовското село Фалише, завчера околу 14 часот било нападнато од двајца ученици во ОУ „Кирил и Методиј“. Инцидентот се случил во дворот од училиштето. Малолетникот бил удрен по лицето со камен. Полицијата повика на разговор двајца 14-годишници и се работи на расчистување на случајот.

Шеснаесетгодишно момче од Скопје се соочува со пријава откако навредувало полицаец во автобус на ЈСП. Во средата околу 7,25 часот, група момчиња гласно пуштале музика во автобусот „53“. Полицаецот ги предупредил да ја намалат музиката и да не ги вознемируваат преостанатите патници. Но, тинејџерот почнал да го навредува полицаецот, по што бил симнат од автобусот. (Г.А.)