„Ветија и го уништија Велија!“

Сопругата на сопственикот на А1, Мазес Рамковска, еден ден по пресудата зборува за проблемите низ кои поминува нејзиното семејство

Даниела Трпчевска


„Уште пред да се отвори судскио�� процес слушнавме муабети дека ’ќе го уништат Велија до просјачки стап’. И ете тоа се случи. А сите знаеме зошто - оти се чувствуваа загорозени од него. Велија знаеше каде не' води оваа власт“. Со овие зборови Мазес Рамковска, сопруга на сопственикот на поранешната телевизија „А1“, Велија Рамковски, ја дочека пресудата за нејзиниот сопруг, ќерката, синот, нејзиниот брат и деверот.

Еден ден по пресудата таа делува на моменти потиштено, за веќе следниот миг нејзиниот глас да добие смирена нота, со доза на борбеност и не помирување со ситуацијата.

Во семејната куќа на Рамковски во скопско Нерези се собрани сите. Мазес која по притворањето на сопругот ја презеде улогата на најцврста во фамилијата се грижи за трите деца на нејзината ќерка Емел, која веќе година и пол е во притвор во затворот „Скопје“. Најстариот внук има 18 години, помалата внука осум, додека најмалото дете само четири години. На него, вели, и' е најтешко да му се објасни каде е неговата мајка, која долго е отсутна од семејниот дом. Покрај Мазес е и нејзината друга ќерка Лејла, која заедно со мајка си не ги пропушташе судските рочишта за случајот „Пајажина“.

„Не очекуваме повеќе ништо. Тоа што се случи вчера беше страшно. Како што и Велија кажа во судот, тој беше осуден одамна. Ова беше едно сценарио, театар. Обвинението како што беше поднесено, така беше префрлено кај судиите, не се измени ништо за време на процесот. Адвокатите немаа никаква улога во одбраната на случајот. Судењето беше само фарса“, вели сопругата на Рамковски, еден ден по пресудата.

Сопственикот на некогашната медиумска империја и неговата обвинета ќерка со која заедо беа во притвор, со смиреност и насмевка ја сослушаа одлуката на судот, со која им пропаднаа сите шанси дека наскоро ќе излезат на слобода. Со одлука на судот, Велија Рамковски го очекува издржување на 13 години затворска казна, додека неговата ќерка Емел и братот Амди ќе треба да одлежат по шест години зад решетките. Затвор му се заканува и на синот на Велија, Хеди Рамковски кој повеќе од една година е во бегство. Осумнаесетмината се осудени на вкупна затворска казна од 109 години поради злосторничко здружување, даночно затајување, перење пари и дела, потоа за злоупотреба на службената положба и овластување и оштетување или повластување доверители.

Со грч на лицето, но без да изразат гласен револт, фамилијата на Рамковски, неговите пријатели и родини завчера пред кривичниот суд цел час ја чекаа одлуката. И по изрекувањето на затворските казни тие продолжија да стојат пред Основниот суд Скопје 1, иако се' веќе беше завршено.

„Ние се држиме цврсто, бидејќи знаевме кон што оди ова, сиот овој процес. Само за ќерка ми се надевав дека ќе има помала казна, за да биде барем со децата. Но, се покажа дека никој нема ниту трошка човечност. Никој не мисли на последиците кои што ќе ги предизвикаат во едно семејство“, вели Мазес Рамковска, објаснувајќи од каде и е силата за да ги издржи овие тешки моменти низ кои поминува нејзиното семејство.

Таа со тешкотија зборува за изминатиот период, откако нејзините најблиски - столбот на фамилијата и нејзините две деца се далеку од семејниот дом.

„Изминатава година ми помина на пат меѓу судот и затворот во Шутка. Немам зборови што да кажам, незнам што повеќе би можела да речам после пресудата“, вели таа издишувајќи со тешкотија.

Во изминатиов период, додека семејството и' се наоѓаше во затворот „Скопје“, таа на секои две недели можела да ги посетува и да разговара со нив. Во затворот често останувала и по неколку часа, за да се види поединечно со сопругот, братот и со ќерката.

Последен пат сопругот го прегрнала во март минатата година, на почетокот на судењето, кога емотивната средба меѓу двајцата сопружници беше фатена и од камерите. Во еден момент по прекинот на рочиштето, Мазес притрча и го прегрна сопругот, што беше проследено со аплауз од присутните во судницата.

Со синот Хеди, пак, таа тврди дека не се видела веќе година и пол. Стравувајќи за неговата безбедност, Мазес Рамковска вели дека нема никаков контакт ниту абер како е тој, од моментот кога станал бегалец. На Хеди Рамковски му се заканува затворска казна од седум години, доколку биде пронајден. Претпоставките се дека заминал надвор од земјава. Засега не се знае каде е неговото скривалиште. По него е се' уште активна потерницата на полицијата.

„Не знам каде е, ниту сакам да имам контакт со него. Нека е само жив и здрав, подготвена сум и цел живот да не го видам, само да знам дека е безбеден и добар“, в��ли Рамковска.

Ако досега секојдневната маршрута и била до судот, а потоа до затворот во Шуто Оризари, сега ќе зачестат нејзините посети на најголемиот затвор во земјава - Идризово. Мазес е загрижена за здравјето на ќерка си која добила астма и добива лекарски третман во затворот.

„Велија е добро, фала му на бога“, вели таа и продолжува: „Ние цело едно семејство сме жртви. Мораа да го тргнат Велија, а тоа можеа да го направат само ако го прогласат за криминалец. Кога ќерка ми ја осудија со мали деца, со едно такво обвинување - нека им е на чест. Педофил кој што со години силувал деца, некој ќе убие човек, па ќе добие помала казна. А овие? Какви дела направиле за да добијат вакви казни?

Една и пол година по отворањето на случајот „Пајажина“, на семејството му се заканува финансиски крах. По затворањето на една од најмоќните телевизии „А1“, на весниците „Шпиц“, „Време“ и „Коха е ре“, како и на многубројните фирми на „Перо Наков“ на кои им беше ставен катанец од Управата за јавни приходи, доведена е во прашање егзистенцијата на семејството Рамковски.

Дополнителен проблем се и судските трошоци, но и барањето на правдата пред странските судови, од која нема да се откажат. Од самиот старт на процесот, Рамковски и неговата ќерка ги застапува адвокатот Мирослав Вуиќ, кој поради неговите приговори и спротиставувања беше отстранет од тимот бранители. Во меѓувреме судот им одреди и адвокати по службена должност, но тие никогаш не беа прифатени од обвинетите.

„Им благодарам на адвокатите кои што и емотивно се влезени во случајот, така што не го поставуваат воопшто прашањето за плаќање на услугите. Ние одамна имаме одлучено, уште првите месеци од приведувањето дека ќе тужиме пред странските судови и ќе бараме правда во Стразбур. Се уште не сме разговарале кој ќе не' застапува, но најверојанто нема да ангажираме нови адвокати“, вели Мазес. Сега кога процесот за „Пајажина“ е затворен, сопругата на Велија Рамковски, посакува само здравјето да ги служи.

„Други надежи и очекувања немаме. Нема мир додека најблиските се во затвор“, вели таа.