19.03.2012, 15:19 Симната тајната од документите за Сопот
Сите потребни списи кои се однесуваат на случајот „Сопот“, а кои беа класифицирани како строго доверливи, од неодамна му се достапни на скопскиот Кривичен суд, но сепак завчерашното судско рочиште беше одложено.
Причина за одложување на судењето е неинформираноста на еден од обвинетите на кого судот му ја укинал мерката куќен притвор, но тој не дошол на судење, веројатно поради тоа што очекувал стражарно да биде спроведен. И токму поради неприсуството на овој обвинет, судот донесе решение судењето да се презакаже за втората половина на април.
Судијата Јани Нича информираше дека од Министерството за одбрана и од МВР се примени решенија со кои се симнува тајноста на одредени документи кои се однесуваат на настанот што се случи на 4 март 2003 година. Кај месноста нарекувана Божја дупка, на локалниот пат меѓу селата Сопот и Сушево, од поставена експлозивна направа загинаа полските припадници на НАТО Павел Легенски и Пјотр Микуловски и македонскиот државјанин Крунислав Кипријановски, а со повреди се здобија уште двајца војници и неколку цивили.
Адвокатскиот тим на обвинетите побара од судот, до следното продолжение, да овозможи увид во декласифицираните документи за да можат да подготват соодветни докази. За конкретниот настан Обвинителството ги товари лицата: Сулиман Сулимани, Самет Љутфии, Хасан Клаиќи, Шабан Лимани, Шакир Сулејмани, син на обвинетиот Сулиман и Зенел Клаиќи, но и на недостапните Башким Укшини, Муса Клаиќи, Сељман Јахии, Самет Лимани и Африм Укшини, сите жители на село Сопот.
Случајот имаше и своја завршница со одлука и на Врховниот суд, но Собранието формира Анкетна комисија со намера да се утврдат сите факти поврзани со настанот, што, пак, значеше комплетно укинување на сите судски одлуки. (Љ.С.)
|
