Жирито се премисли  да му додели „Штајгер“ на Ердоган

Германското жири, кое ја додели престижната награда „Штајгер“ на турскиот премиер Реџеп Таип Ердоган, се откажа од одлуката и ја повлече наградата, откако Ердоган го откажа патувањето во Германија во саботата, каде што требаше да присуствува на церемонија во градот Бохум за да го добие одликувањето, пишува весникот „Заман“, повикувајќи се на информација на „Дојче веле“.

Турскиот премиер ја откажа посетата на Германија поради смртта на 12 турски војници во Авганистан, кои загинаа на 16 март при хеликоптерска несреќа.

Весникот „Заман“ наведува дека наградата „Штајгер“ се доделува од 2005 година на личности со придонес за поттикнување на толеранцијата и заштитата на човековите вредности.

Изданието посочува дека првично организаторите на наградата изјавиле дека таа ќе биде доделена на Ердоган за неговите напори за демократизација во Турција и за интеграција на земјата во Европа.

На крајот, меѓутоа, под притисок на протестите на здруженијата на алавитите, ерменски организации и приврзаници на Курдската работничка партија (ПКК) во Германија, организаторите ги промениле аргументите за врачување на наградата, додава „Заман“.

Дваесет и четири часа пред церемонијата на доделување на наградата организаторите истакнале на својот сајт дека наградата ќе биде врачена на турскиот премиер по повод 50-годишнината на турско-германското пријателство, а категорично не поради неговата деност во областа на внатрешната и надворешната политика. По откажувањето на посетата на Ердоган, организаторите го откажале целосно врачувањето на наградата на турскиот премиер.