Карзаи: Војниците да се вратат во базите

Претседателот Хамид Карзаи на американскиот министер за одбрана му предочи дека авганистанските сили се подготвени да ја преземат одговорноста за заштита на сопствената земја

КАБУЛ – Талибанска милитантна група соопшти дека ги суспендира разговорите со САД. Талибанскиот портпарол Забиула Муџахид во вчерашното соопштение наведе дека САД постојано ги менуваат условите за преговарање. Муџахид изјави дека талибанците само сакале да дискутираат за размена на затвореници и отворање политичка канцеларија во Катар, додека американските преговарачи сакале да ја прошират дискусијата. Муџахид наведе дека не сакале во разговорите да бидат вклучени авганистанските власти.

Авганистанскиот претседател побара меѓународните сили да се повлечат од руралните области и села во главните бази, и дека авганистанските сили треба да ја преземат контролата врз безбедноста низ целата земја во 2013 година.

Претседателот Хамид Карзаи вчера изјави дека авганистанските сили се подготвени да ја преземат одговорноста за заштита на сопствената земја. Тој додаде дека трансферот на овластувањата треба да се случи пред сегашниот краен рок, кој истекува во 2014 година. Тој рече дека ова му го кажал и на американскиот секретар за одбрана, Леон Панета.

Преговорите околу договорот, со кој ќе се уреди присуството на американските сили во Авганистан по повлекувањето на најголемиот дел од борбените единици до крајот на 2014 година, беа напнати дури и пред убивањето на цивилите, меѓу нив девет деца, во јужната провинција Кандахар, што се случи во неделата. (Ворлд тајм)