Маскирани лица нападнале старец во неговата куќа во штипското село Драгоево

Штип,  - Во СВР Штип денеска е пријавено дека околу 18,30 часот од две маскирани лица е извршено разбојништво над С.М.(80) од штипското село Драгоево.


Портпаролот на СВР Штип, Снежана Санева информира дека разбојништво се случило во куќата на С.М, кога во критичниот момент гледајќи телевизија му снемало струја.

- Откако С.М забележал дека кај соседите има струја помислил дека нешто не е во ред со осигурачите, поради што зел светилка и нож и се упатил кон горниот дел на куќата, каде се наоѓала разводната табла. Качувајќи се по скалилата од зад грб ненадејно го напднале две маскирани лица, појасни Санева.

Со намера да се одбрани, старецот успеал со нож да повреди еден од напаѓачите во горниот дел на ногата. Напаѓачот со истиот нож на С.М му нанел повреда во пределот на вратот, по што му се одземени 6.000 денари.

Повредениот старец во неговата куќа во штипското село Драгоево е пронајден утринава од страна на неговиот внук, по што веднаш е хоспитализиран во Клиничката болница-Штип, а во тек е хируршка интервенција.

Полицијата трага по двајцата разбојници, од кои едниот има повреди на ногата.  (МИА)