21.03.2012, 14:21 Кривична пријава за Рамиз Мерко
Струшкиот градоначалник е осомничен за давање одобрение за градба на спорен објект на Охридското Езеро
Струшкиот градоначалник Рамиз Мерко ќе биде кривично гонет за злоупотреба на службената положба и овластување. Полицијата поднесе кривична пријава против него, во која се наведува дека пред две години на приватна фирма и' издал одобрение за поставување шанк на Охридското езеро, а место тоа никнал објект со тврда градба и површина поголема од предвиденото. Мерко, пак, во вчерашната изјава за нашиот весник, тврди дека не е запознаен со случајот.
Министерството за внатрешни работи во вчерашниот билтен извести за кривичната пријава против „Р.М. (55), градоначалник на Струга“. Освен него, пријави се поднесени за Ќ.П. (42) од Велешта, сопственик на „Бени маркет“ ДООЕЛ Струга, кој се сомничи за бесправно градење и узурпација на недвижности.
„Во септември 2010 година Р.М. издал одобрение за поставување урбана опрема (монтажен шанк) во Струга на брегот на Охридското Езеро на правното лице ‘Бени Маркет‘, но тие изградиле објект од тврда градба, со поголема површина, а Општината не извршила контрола“, соопшти МВР.
Лани, пак, според пријавата, Мерко издал ново одобрение за објектот, иако Министерството за култура донело одлука парцелата да се стави под привремена заштита како културно наследство, а дека објектот е тврда градба, а не сезонска опрема.
Градоначалникот на Струга вчера ни тврдеше оти првпат слуша дека против него е поднесена кривична пријава. Откако му прочитавме за што станува збор, само кусо ни рече: „Немам информации, администрацијата се занимава со такви работи“.
Мерко, кој е кадар на ДУИ не е во идилични односи со ВМРО-ДПМНЕ, поточно со нивниот општински комитет во Струга. По карневалот во Вевчани, во Струга беа организирани низа протести кои ги разгореа меѓуетничките односи во градот. (Г.А.)
|
