22.03.2012, 12:07 (ОБНОВЕНО) Ликвидиран убиецот на деца од Тулуз
Мохамед Мерах скокна од прозорецот со оружје во рака и беше убиен од полицијата
ТУЛУЗ - Дваесет и тригодишниот напаѓач осомничен на убиство на седум лица во југозападниот дел на Франција во име на Ал Каеда, скокна од прозорец во својата смрт со дожд од куршуми откако полицијата упадна во неговиот стан. „Во моментот кога видео сондата беше поставена во бањата, убиецот излезе од таму и отвори оган со неверојатно насилство“, изјави министерот за внатрешни работи Клод Геан, додавајќи дека Мерах пукал од неколку оружја во исто време. „На крајот Мохамед Мерах скокна од прозорецот со оружје во рака, притоа продолжувајќи да пука. Долу само беше константирана неговата смрт“, изјави тој пред новинарите на местото на злосторот. Двајца полициски специјални беа повредени.
Специјалните сили влегоа во петкатната зграда во предградието на Тулуз откако го опколија Мерах уште во средата претпладнето. Геан предходно изјави дека полицијата се надева оти жив ќе го уапси Мерах, кој им призна на полициските преговарачи дека ги убил тројца војници како и три еврејски деца и рабин во училиште.
Претседателот Никола Саркози, чиишто веќе слаби шанси за победа над предизвикувачот од редовите на социјалистите на претседателските избори закажани за следниот месец можеби се загрозени од неговиот одговор на кризата, вети дека правдата ќе биде задоволена и апелираше до народот да не бара одмазда.
Денеска претпладне, резултатите од првата анкета од пукањето пред училиштето, покажаа дека Саркози со мала разлика ќе го победи социјалистот Франсоа Холанд во првиот круг од гласањето. Но, Холанд ќе забележи предност од осум процентни поени во вториот круг. Во текот на ноќта имаше долга тишина од страна на Мерах, кој рече дека сакал одмазда за смртта на палестинските деца и инволвираноста на француската армија во Авганистан. „И покрај обновените напори во текот на ноќта за повторно воспоставување на контакт вербално и преку радио, немаше контакт, никакво покажување од негова страна“, изјави Геан.
Извор од полицијата изјави дека немањето активност забележана со визирите за ноќно гледање можеше да значи само дека Мерах е заспан, но времето притискаше. „Во еден момент ќе треба да влеземе и видиме“, изјави изворот.
Мерах, француски државјанин со алжирско потекло кој со години е под надзор на разузнавачките служби, пукаше во полицијата кога му се приближија во средата во утринските часови и подоцна им се фалеше на преговарачите дека ја довел Франција на колена. Тој посочи дека единствено жали што не бил во можност да изврши уште повеќе убиства. (Ројтерс)
|
