Ќе се ловат и бизнисмени во мрежата на лустрација

Чекајќи ја одлуката на Уставниот суд, стигна предлог за сосема нов закон за лустрација

Пратеничката група на ВМРО-ДПМНЕ нуди комплетно нов закон за лустрација, со кој се предлага да се лустрираат и лица кои стекнале капитал во претпријатијата со општествена сопственост, според Законот за трансформација на претпријатија со општествен капитал.

Со предлогот се предвидува јавно објавување на имињата на соработниците и можност физички лица да имаат пристап до информациите собрани за нив, на нивно барање, на барање на нивни роднини по прва линија до втор степен, вклучително и на лица овластени од нив со полномошно заверено на нотар. Комисијата за верификување на фактите, меѓу другото, ќе има надлежност и да покренува постапка по иницијатива на трети лица.

Временскиот опфат на лустрацијата ќе биде до 2006 година, односно, според Силвана Бонева од ВМРО-ДПМНЕ, до носењето на законот за слободен пристап на информации од јавен карактер.

Во однос на опсегот кој беше спорен за Уставниот суд, а се однесуваше на новинарите, радиодифузните претпријатија, верските заедници, политичките партии, лицата од невладините организации и фондации, Бонева рече дека во овој закон се предвидува дека Комисијата на нивно барање може да изврши процес на лустрација.

„Не е обврска да се лустрираат ниту невладините организации, ниту политичките партии, верските заедници, медиумите и радиодифузните друштва“, вели Бонева. Таа појаснува дека тоа може да го направи Комисијата за верификација на факти врз основа на барање на раководството или работодавецот. „Оцена е на раководството на политичката партија, на радиодифузниот сервис, поединечно на секој оној што сака да се лустрира, да даде писмена изјава до неговиот одговорен раководител и тој да ги достави документите до Комисијата за лустрација“, рече Бонева.

Документот е насловен како текст на законот за определување услов за ограничување за вршење јавна функција, пристап до документи и објавување на соработката со органите на државната безбедност. Текстот е изготвен во соработка со ДУИ и парламентарните коалициски партнери на ВМРО-ДПМНЕ. Текстот вчера им е поделен на сите пратенички групи и независни пратеници во Собранието. Законот ќе биде официјално поднесен откако до пратеничката група ќе пристигнат забелешките од сите претставници во Собранието.

Новиот закон за лустрација се предлага во време кога се чека на одлуката на Уставниот суд, кој на 25 јануари оваа година поведе постапка за оцена на уставноста и законитоста на повеќе спорни одредби од постојниот закон, но и од направените измени во два наврата. Поради привремената мерка што ја изрече Судот, во моментот сите дејства поврзани со лустрацијата се стопирани. Комисијата за верифицирање факти не прима нови изјави и се занимава со технички работи. (П.Р.)