Петти обид за вртелешка на плоштадот

Распишан е тендер за поставување карусел со коњчиња и кочии

Бојан Шашевски



Нов обид на градските власти да постават вртелешка на централниот градски плоштад. Неодамна Јавното претпријатие „Паркови и зеленило“ распиша повторен јавен повик за избор на изведувач на објектот кој треба да биде уште една забава за скопјани. Замислата е на плоштадот „Македонија“ да биде поставен карусел со ротирачка платформа, од каде што родителите и децата ќе вртат крукчиња додека се возат во кочиите или на коњите и така од различни страни ќе можат да ги видат спомениците и околните нови објекти.

Иницијатор за поставување на вртелешката е Градот Скопје, кој за реализирање на проектот го субвенционирале претпријатието со 10 милиони денари.

Од „Паркови и зеленило“ потврдуваат дека во тек е повторен, петти тендер. Причината за неуспешноста на минатите повици ја насочуваат кон неможноста да се договорат со фирмите-изведувачи околу економските и техничките услови за проектирање на вртелешката.

„Со петтиот јавен повик ги менуваме техничките карактеристики на каруселот. Сега бараме електричен мотор со помала моќност. Се надевам дека овој пат тоа ќе влезе во предвидената цена и повикот ќе биде успешен. Меѓународниот јавен тендер ќе трае еден и пол месец, односно 52 дена“, вели директорот на „Паркови и зеленило“, Душан Авировиќ, и додава дека каруселот ќе има 15-16 коњи со колички за четири лица, декоративен венец и дрвена ротирачка платформа.

Авировиќ не открива каде точно на плоштадот ќе никне ваквата забавна содржина. Иако имаше некои објави дека вртелешката ќе го украсува плоштадот „Македонија“ со својата неокласична архитектура, со барокен стил, сепак, тој не верува дека ќе има таков изглед.

„Обложувањето на каруселот зависи од нарачателот, но искрено мислам дека нема да има барокни елементи. Сепак, се работи за забавен реквизит кој, пред се', треба да биде привлечен и да ги анимира децата“, смета Авировиќ.

Од Градот не кажуваат детали околу идниот проект. Единствено информираат дека постапката за јавна набавка е во тек и неа ја спроведува „Паркови и зеленило“.

„По завршувањето на тендерската процедура, сите релевантни информации поврзани со функционирањето на овој проект ќе бидат објавени“, одговараат градските власти.