Доделени наградите на фестивалот на античка драма Стоби 2012

Најдобар режисер на овогодишното издание на фестивалот е Кенан Ишак, a „Антигона“ ја доби и наградата за најдобра претстава

Во античкиот театар Стоби синоќа беа доделени наградите на 11. фестивал на античка драма „Стоби 2012“.

Наградата за најдобра машка улога му припадна на Бранко Штурбај за улогата на Ефклион во претставата „Алуларија“ на Хрватскиот народен театар од Вараждин. Јулијана Мирчевска ја доби наградата за најдобра женска улога за улогата на Медеја, која синоќа беше одиграна на сцената на античкиот театар во Стоби на Народниот театар од Битола.

Најдобар режисер на овогодишното издание на фестивалот е Кенан Ишак, режисер на претставата „Антигона“ на Турскиот национален театар од Истанбул. Претставата „Антигона“ ја доби и наградата за најдобра претстава на Стоби 2012.

Ова е едногласната одлука на тричленото жири на Фестивалот на античка драма Стоби во состав Четинал Томрис – претседател и членовите Слободанка Чичевска и Јордан Витанов.

Директорот на фестивалот Зоран Љутков е задоволен од овогодишното издание на фестивалот, особено заради тоа што тој секоја година се повеќе расте. Според проценките на Љутков, оваа година фестивалот го посетиле околу 6000 љубители на театарската уметност. За организација на фестивалот на античка драма Стоби оваа година буџетот изнесувал 2,8 милиони денари од кои еден милион ги обезбеди општина Велес, 800,000 денари Министерството за култура на Република Македонија, а останатите ги обезбеди организациониот одбор на фестивалот по пат на спонзорства. Златен спонзор на фестивалот е винаријата Стоби.