Филмот на Теона Митевска ќе се бори за Европските филмски награди

Филм ја доби номинацијата и влезе меѓу најдобрите 40 европски филмови кои оваа година ќе се борат за Европските филмски награди

Новиот филм на Теона Митевска, „Жената која ги избриша своите солзи“, ја доби номинацијата и влезе меѓу најдобрите 40 европски филмови кои оваа година ќе се борат за Европските филмски награди.

Сите 40 препорачани филмови ќе бидат дистибуирани до целосното членство на Европската академија, која брои 2500 членови, вбројувајќи ги најголемите европски имиња на филмската индустрија, меѓу кои и: Вим Вендерс, Педро Алмодовар, Михаел Ханеке, Кен Лоуч, Жулиет Бинош, Кетрин Денев, Лив Улман, итн.

Филмовите кои ќе добијат официјална номинација ќе бидат соопштени во ноември на Филмскиот фестивал во Севиља, Шпанија. Церемонијата на доделувањето на Европските филмски награди, пак, годинава ќе се одржи во Малта, на 4 декември.

„Жената која ги избриша своите солзи“ инаку го продолжува својот богат фестивалски живот. Во август ќе учествува на три фестивали, на Интернационалниот филмскиот фестивал во Херцег Нови, Црна Гора, на Интернационалниот филмски фестивал Еспо, Финска, како и на Интернационалниот филмски фестивал во Тузла, Босна и Херцеговина. (Т.И.)