Готвење по 22 часот, од парно нема исклучување

Не стивнуваат реакциите откако Регулаторната комисија ја укина дневната евтина тарифа, а со новиот Правилник тешко ќе оди исклучувањето на парното

Маја Томиќ



Не стивнуваат реакциите откако Регулаторната комисија ја укина дневната евтина тарифа, а со новиот Правилник тешко ќе оди исклучувањето на парното, а и оние што се веќе исклучени ќе мора да плаќаат по 10 денари од квадратен метар.

Со укинувањето на евтината, дневна тарифа на струјата, ќе се сменат и животните навики на граѓаните. Пред се' на пензионерите, невработените, мајките на трудничко боледување и социјално загрозените категории. Тие нема да можат како до сега, колку-толку да заштедат струја преку ден, односно од 13 до 16 часот да зготват ручек, да ја вклучат машината за перење, бојлерот или да испеглаат алишта.

И додека на граѓаните им врие главата од зголемувањето на цените и деновиве постојано го искажуваат својот револт по медиумите, нема никакви реакции од „Топлификација“ и од ЕВН „Македонија“ во смисла да предложат измени на новите одлуки на Регулаторната комисија. Познато е дека таа им ги одобри барањата за зголемување на цените затоа што имале зголемени финансиски трошоци поради поголемиот увоз, а така требало да биде бидејќи имало голема потрошувачка. Па, нивната финансиска дупка сега ќе ја пополнуваат граѓаните преку подебелите сметки.

И додека луѓето се чудат како да ги издржат зголемените трошоци, од ЕВН велат дека е дојдено време за да се сменат навиките и дека во европските земји одамна нема евтина струја преку ден.

„Со тоа што ја укинавме дневната евтина тарифа, сакаме да стимулираме штедење, а не трошење. Не може да се троши најмногу енергија попладне што значи дека се набавува д��евна струја, а таа е најскапа. Мора да се сменат навиките, енергијата треба да се троши балансирано и само навечер да се користи евтината тарифа. Така е во многу европски земји“ велат од ЕВН.

Од таму велат дека останува евтината тарифа која е од 22 навечер до 7 часот наутро и цел ден во недела.

Додека Владата и Регулаторна молчат на сите реакции на граѓаните, вчера се огласија партиите, сите барајќи Регулаторна да ги повлече правилникот за парно греење и новиот тарифник за струја. ВМРО- НП ја посочија Владата како главен виновник за поскапувањата.

Според Демократски сојуз пак, со новиот правилник изготвен од Регулаторната комисија за енергетика, се засилува монополската позиција на „Топлификација“, а на граѓаните им се наметнуваат нови обврски.

Од Организацијата на потрошувачи на Македонија, ОПМ, велат дека официјално ќе реагираат в понеделник.

„Ќе ги разгледаме новите правила и ќе дадеме стручен осврт и критика, со можност некои одредби да се оспорат пред Уставниот суд. Нашето мислење во врска со новиот правилник за топлинска енергија воопшто не е земено во предвид од страна на Регулаторна“, велат од ОПМ и додаваат дека Регулаторна во екот на годишните одмори носи одлуки за поскапување за да ги намали реакциите од граѓаните.