Груевски: Бранко е како Гадафи. СДСМ најави серија протести и блокади

Граѓаните да размислат дали Македонија или Бранко им е поважен, изјави шефот на Владата

Бранко Црвенковски продолжува во стилот на Гадафи. Продолжува да живее во еден свој свет со сериозна доза на алтруизам, живеење во еден свој свет каде што верува дека целиот народ е со него, дека сите го поддржуваат и дека треба на сила да се заземе власта, рече  премиерот Никола Груевски.

Одговарајќи на новинарско прашање за пораките од лидерот на СДСМ упатени до него, Груевски рече дека од она што го разбрал од изјавата, Црвенковски нема барања. "Тој денеска не изнесе барања, туку единствено сака да дојде на власт и дека тоа ќе го прави на насилен пат, со блокади, со уцени, собирање народ, со вжештување на атмосферата со вртење на луѓето едни против други, со немири, и секакви проблеми со кои еве и вчера се обиде да направи, обидувајќи се да влезе во Парламентот и со насилство да го запоседне", рече тој.

Груевски рече дека Црвенковски влегува во една фаза во која целосно го има изгубено чувството за реалност. "Тој отворено кажува дека е цврсто решен да се врати на власт со примена на насилство, со тепање како што вчера се обиде кога тргна кон пензионерите, земјоделците, студентите и кон сите оние што беа на другата страна. Од тој аспект загрижува неговото однесување, тоа е лошо за демократијата. Тоа е една патолошка зависност од власт. И кога зборувам патолошка, тоа е многу опасно", рече Груевски.

Шефот на Владата вели дека е нормално некој да покаже демонстрира или на некој начин да штрајкува но се' додека не употреби насилство. Во оној момент кога ќе употреби насилство тоа е веќе кршење на законите и Уставот, рушење на имиџот на државата, правење лоша слика за земјата, рече Груевски во вчерашната изјава.

"Забележувам дека во сите настани кои го рушат имиџот на државата во последните години директно учествува самиот Бранко Црвенковски. Останува на неговото членство да оцени и да одбере дали ќе го вложи својот личен капацитет и углед. Секој човек поединечно си има свој углед заради кариерата на еден човек кој живее во еден свој свет и има изгубено чувство за реалност или ќе одбере Македонија која прави напредок и реформи и Македонија во која се спроведуваат проекти.

Премиерот упати апел до членовите на СДСМ да ја согледаат ситуацијата во која ги води нивниот лидер, во која, како што рече, нема ниту барања, туку по која било цена да се врати на власт. "Кажува јасно дека доколку нема друг начин ќе оди на сила и на сила ќе се враќа на власт. Не го интересира ниту имиџ на држава, ниту народот, ниту дали тоа народот го поддржува, ни демократските процеси како ќе се одвиваат понатаму, ниту дали некој ќе настрада, дали ќе го загуби животот во некои такви пре��метки што се најавуваат, дали некој ќе биде повреден", рече Груевски.

Тој тврди дека реакцијата на собраниското обезбедување следувала откако бил нападнат и евакуиран претседателот на Собранието Трајко Вељаноски и била заземена неговата работна маса. Тој нагласи дека доколку не реагирало собраниското обезбедување веројатно ќе бил доведен во прашање животот на претседателот на Собранието. "Собраниското обезбедување со крајни напори го извлече од салата претседателот на Собранието и беше запоседнато Собранието. Почнаа да се качуваат пратениците на СДСМ на маса, да скокаат, да рипаат, да тегнат микрофони, седнаа на столчето на претседателот", изјави вчера Груевски. (П.Р.)

СДСМ најави серија протести и блокади

Црвенковски вчера изјави дека опозицијата нема да се врати во Собранието и ќе дејствува со блокади на раскрсници, митинзи и поддржување граѓански отпор и непослушност

Наум Котевски

Со вчерашното полчасовно блокирање на клучните сообраќајници во сите градови ширум државата опозицијата го започна своето најавено вонинституционално дејствување.

Лидерот на СДСМ, Бранко Црвенковски, најави дека опозицијата нема да застане и дека ќе го засили притисокот врз, како што рече, недемократската и режимска власт. Социјалдемократите и нивните коалициски партнери нема да се вратат во Собранието.

„Ќе организираме и ќе поддржиме секаков облик на граѓански отпор и непослушност. Ќе поддржиме секаков вид митинзи, протести, блокади на сообраќајници. Овие активности ќе траат до петок навечер“, рече Црвенковски, не исклучувајќи ја можноста опозицијата да го подржи и неплаќањето на даноци и сметки од страна на граѓаните.

Некои од овие активности опозицијата претходно ќе ги најави, а некои, како што додаде Црвенковски, од разбирливи причини нема да ги најави. Тој, меѓу другото закажа протест што треба да се одржи в сабота во 12 часот пред седиштето на ВМРО-ДПМНЕ.

„Тоа е логична локација имајќи предвид дека оваа партија ја узурпираше државата и ја претвори во партиско-полициска држава. Крајната цел на се' што ќе направиме во наредниот период е враќање на уставниот поредок и демократијата во Македонија“, рече Црвенковски.

Според него во понеделникот било извршено класично убиство со умисла на Уставот и демократијата. „Она после кое за македонското општество нема враќање назад е насилничкото претепување и исфрлање надвор од парламентот на пратениците, народните избраници. И зошто? Само затоа што сакаа да го одбранат Уставот, законот, деловникот. И тоа не беше се'. Како и секоја диктаторска и кукавичка власт се обидоа тоа да го скријат од очите на јавноста и со примена на физичка сила ги исфрлија и новинарите“, посочи Црвенковски.

Според него досега во светот не е видено полиција да влезе во судир со пратеници. „Имало судири меѓу пратеници на опозицијата и позицијата во низа европски парламенти. Но досега не е видено полицијата да тепа пратеници“, рече Црвенковски.

На новинарското прашање како може да се надмина политичката криза Црвенковски одговори дека тоа е можно само ако си замине Никола Груевски. Лидерот на социјалдемократите отфрли било каква можност опозицијата да учествува на локални или парламентарни избори без сигурни гаранциии за фер и демократски избори, барајќи притоа и засилен мониторинг. Црвенковски вели дека по последните случувања владејачката гарнитура нема легитимитет да организира избори.

Црвенковски исто така ја отфрли и можноста за лидерска средба, прашувајќи ги новинарите за што воопшто би можеле да разговараат власта и опозицијата по бруталното претепување на пратениците.

Според СДСМ во понеделникот во Собранието били прекршени 10 члена од Уставот.

„Не ни беа дадени картиците, со што ни беше апсолутно ускратено правото и да се јавиме за збор. Доколку ни ги дадеа можеби и ќе имаше расправа. Вратата од сала 1 беше заклучена, а со обезбедување бевме спроведени на утринската координација кај претседателот на парламентот“, рече Јани Макрадули потпретседател на парламентот од редовите на СДСМ.

Според Уставот, како што додаде Макрадули пратеник не може да биде отповикан, а во Собранието се случило токму тоа - отповикување во име на друг.

„Со исфрлањето ни беше одземен мандатот. Требаше секој да го види бесот и гневот кај претседателот Вељаноски кој викаше: „Исфрлете ги, ифрлете ги“, додека Антонио Милошоски снимаше качен на масата. Истото им се случи и на новинарите. Според законот седниците на парламентот се јавни, а новинарите може да излезат само со двотретинско гласање. Во Собранието во понеделникот имаше 44 лица без обележја дека се обезбедување, како што, впрочем, налагаат правилата на МВР“, рече Макрадули, најавувајќи кривични пријави за вмешаните во инцидентите.