ВМРО-НП: Се случија преседани, кои се реткост во светската демократија

Полицијата насила го одзема мандатот на пратениците, добиен на избори за кои гласале 370.000 граѓани, е реакцијата на ВМРО-Народна

Партијата на Љупчо Георгиевски е „згрозена од настапот на владејачката структура во текот на завчерашниот ден“. За ВМРО-НП, во понеделникот се случиле повеќе преседани кои прв пат се гледаат не само во 20-годишната македонска демократија, туку претставуваат реткост и за светската демократија.

ВМРО-Народна денеска одржала седница на Извршниот одбор на која се расправало за случувањата во Собранието и пред него. За партијата не постои дилема околу прашањето кој прв започнал со организирање толпа, односно дека токму владејачката ВМРО-ДПМНЕ е таа којашто застанала зад таканаречениот „Народен фронт“, а се' заради креирање конфликт меѓу македонскиот народ пред парламентот. Оттаму потсетуваат дека првпат се случува во македонскиот парламент насила да бидат избркани новинарите-известувачи, а потоа без нивно присуство да се реализира планираната бруталност врз пратениците од опозицијата.

„Многу често сме гледале тепачки и разни метежи во многу парламенти, но никогаш и никаде не сме виделе припадници на безбедносните сили насила да ги вадат парламентарците од парламентот. Бевме сведоци како педесетина припадници на безбедносните сили насила го одземаат мандатот на пратениците, добиен на избори за кои гласале 370.000 граѓани“, се вели во дел од соопштението на ВМРО-НП и се додава дека доколку не успеал наводниот државен удар на СДСМ, тогаш успешно бил извршен државен удар врз демократијата преку покажаната бруталност и тоталитарност на ВМРО-ДПМНЕ.

За ВМРО-Народна партија, неизгласувањето на буџетот не би претставувало ништо особено и не би била загрозена демократијата, а привременото финансирање, според оваа партија, не е нешто ново и непознато, бидејќи такво искуство, како и многу земји во светот, сме имале и ние.

На завчерашните протести учествуваше и лидерот на партијата, Љупчо Георгиевски. Од ВМРО-Народна велат дека Георгиевски, како и еден ден пред тоа, бил на протестите, но завчера морал да замине порано поради здравствени проблеми. За сите натамошни чекори што ќе бидат преземени ќе следува координација со сите други опозициски партии. (Љ.С.)