25.12.2012, 14:15 Нови пријави во акцијата „Керозин“
По повеќе од еден месец од реализацијата на акцијата „Керозин“, полицијата во соработка со УЈП, продолжи со преземање на мерки и активности за обезбедување докази за сторени кривични дела. Продолжението на акцијата резултираше со поднесување на пет кривични пријави за 16 физички и пет правни лица.
Kако резултат на дополнителните активности, МВР обезбедила докази за инволвираност на десет нови лица, но и за шестмина кои претходно беа пријавени. Така, било утврдено дека шестмина се вработени во општините Чаир и Гази Баба, ЈЗУ „Институт по белодробни заболувања кај децата-Козле“, Средното училиште „Браќа Миладиновци“ во Драчево, Државниот студентски дом “Бранко Станоевиќ“ во Гостивар и ЈЗУ „Општа болница-Куманово. Станува збор за лица задолжени за прием и контрола на испорачани количини на нафта, а кои се сомничат дека примале поткуп и дека ја злоупотребиле службена положба и овластување.
Истрагата покажала дека осомничените Љ.П., Љ.Т., М.П., М.Д. и М.П., само во текот на оваа година на Д.Ѓ. му дале поткуп од 150.000 денари, а другите осомничени примиле од 30.000 до 70.000 денари.
За лицето М.Х.(46), вработен во Општината Чаир, се тврди дека со начинот на кој работел со неготинската фирма „Алма-Комерц“ ја задолжил општината за 13.516.160 денари. Неговиот колега од Општината Гази Баба и' овозможил на групата да се стекне со противправна имотна корист во висина од 3.249.838 денари, односно биле „заштедени“ 55.082 литри гориво за греење. Штетата која што била причинета во кумановската болница е проценета на 173.126 денари и истата е приченета со неиспорака на мазут, а купната штета од неиспораката на 2.807.999 литри нафта изнесува 2.385.577 евра, за колку што бил оштетен државниот буџет. (Љ.С.)
|
