Грција шокирана од „бокс-демократијата“ во Македонија

Сите медиуми нагласуваат дека вакви слики, типични за Тајван, досега не биле видени од нашата држава

Од нашиот дописник
Миркица Поповиќ


Атина - Грчките медиуми вчера беа преплавени со вести и видеоинсерти од собраниските инциденти во Македонија околу гласањето за новиот буџет. Се пренесуваат како шок и изненадување судирите на граѓаните од двете групи протестанти и инцидентите меѓу пратениците внатре во Собранието, со коментар дека ова е првпат да се случат вакви сцени во Македонија. Вестите за судирите беа главни во информирањето за случувањата во светот во божикните изданија на грчките телевизии, кои вообичаено се навикнати да пренесуваат вести за насилството во Атина против владините мерки за штедење.

Весникот „То вима“ со наслов „Ќотекот е излезен од... парламентот на БЈРМ“ коментира дека собраниското обезбедување се судрило со опозицијата во расправата околу гласањето на буџетот. „То вима“ пренесува дека владеела тензична ситуација и имало инциденти пред и во Собранието додека опозицијата ја обвинувала владата на Никола Груевски за обид за државен пуч. Весникот става акцент на фактот дека новинарите и опозицијата биле насилно отстранети од собраниската сала, опишувајќи го хаосот од видеата, на кои се гледаат пратеници со растргани алишта, како и носење на раце на повредените пратеници. Се пренесува и реакцијата на Здружението на новинари поради нивното неосновано отстранување од Собранието, со коментар дека прв пат во историјата на државата на новинарите им било забрането да ја следат работата на институцијата. Според процените на грчките медиуми, пред Собранието имало околу 2.500 симпатизери на ВМРО-ДПМНЕ и Никола Груевски од едната страна и околу 1.000 симпатизери на СДСМ на другата, а полицијата се обидувала во средина меѓу двете групи да не дозволи тензиите да ескалираат и да дојде до поголеми немири.

„Парламентот во Скопје се претвори во боксерски ринг“, „Ќотек и повредени во собранието на БЈРМ“, „Опозицијата во БЈРМ повикува на гнев и граѓанска непослушност“, „Ќотек и немири внатре и надвор од Собранието“, „Се заострува тензијата меѓу владата и опозицијата“, „Опозицијата на БЈРМ надвор на улиците“ се само дел од насловите во грчките медиуми, чии онлајн- вести за судирите во Македонија беа едни од најпопуларните и најчитани вчера.

Медиумите пренесуваат дека Македонија длабоко загазува во сериозна политичка криза, не само поради судирите, туку и поради начинот на кој насилно е изгласан буџетот за 2013 година. „Неверојатни сцени во Скопје, срамни сцени беа забележани внатре и надвор од Собранието“, пренесува грчката телевизија Мега, коментирајќи дека сцени��е кои се случиле во Скопје до сега биле навикнати да ги гледаат само во собранијата на Тајван. Телевизиите Мега и Антена пренесоа и видеоснимки од немирите во Скопје, судирите на демонстрантите со полицијата пред Собранието, како и снимки од турканиците меѓу собраниското обезбедување и пратениците.

Медиумите го пренесуваат и повикот на лидерот на опозицијата, Бранко Црвенковски за граѓанска непослушност и демонстрации како оние во Србија во 2000 со кои беше срушена владата на Слободан Милошевиќ, како и реакцијата на Владата која ги обвинува СДСМ за неуспешен обид да создадат хаос во државата.

Онлајн-изданието на неделникот „Прото тема“ во шок говори за неверојатни сцени на тензија и инциденти со повредени граѓани и пратеници за време на гласањето на буџетот. Весникот „Та неа“ посочува дека македонската опозиција одлучила да го напушти парламентот најавувајќи дека по сите инциденти е целосно погазен државниот Устав и демократијата во државата, ставајќи ги на едната страна диктаторскиот режим на Груевски, на другата народот.

Билт: Ова не е демократија за ЕУ

„Многу вознемирувачки вести од Скопје за упад на полицијата во парламентот и за исфрлање на опозициските парламентарци. Вака не треба да функционира една ЕУ-демократија“.

Со овие зборови Карл Билт, шведски министер за надворешни работи и добар познавач на Балканот, ги оцени настаните во нашата држава, преку кратка реакција на својот профил на „Твитер“. Пред помалку од еден месец тој беше првиот шеф на дипломатијата на една држава што безрезервно кажа „да“ за давање датум на Македонија за преговори со Европската унија. Лошата вест од Македонија го разбуди стариот скептицизам дека земјава колку и да прави прогрес, потоа се враќа назад. Откако сликата со транспарентот „Non pasaran“ на борците го обиколи светот, вчера низ највлијателните светски медиуми се вртеа како топ вест снимките од парламентот на кои, како што посочи Си-Ен-Ен, во првите неколку минути „тој што се гледа со црвена вратоврска е вицепремиер и министер за финансии во македонската влада“, а една од парламентарките што ја влечеа беше бивша вицепремиерка.

За настаните во македонскиот парламент, што ги пренесоа сите водечки агенции и медиуми, сепак повеќе говореше слика отколку текст, поради божикните празници. Видеата како насилно се исфрлаат парламанетарците, како играат пендраците пред парламентот и како опозицијата го обиколи спикерот Трајко Велјановски за да го спречи да ја почне расправата за буџетот, масовно осамнаа во светот.