24.12.2012, 13:48 Челзи ја потопи Астон Вила
Погодувајќи еднаш во победата од 8:0 Лампард стана нов клупски рекордер со 130 погодоци
Френк Лампард стана најефикасниот стрелец на Челзи во највисокиот фудбалски ранг во Англија за време на шокантната победа од 8:0 против немоќниот состав на Астон Вила на „Стемфорд бриџ“. Сите можни рекорди паднаа во попладнето што долго ќе го памети младиот тим на Вила, кој го претрпе најтешкиот пораз на клубот во сите овие години на играње во англиската елита. Дебаклот од 7:1 кај Челзи во март 2010 година беше меѓу досега највисоките.
Лампард стана рекордер на Челзи со 130 гола за клубот во највисокиот ранг на натпреварување, престигнувајќи го Боби Темблинг (129). Капитенот погоди во својот 500. настап во Премиер-лигата, постигнувајќи го својот 100. премиерлигашки гол во Лондон. Само Тиери Анри (133) има постигнато повеќе голови во престолнината.
Уште шестмина се запишаа во листата на стрелците, што е уште еден рекорд во Премиер-лигата. Фернандо Торес (3. минута), Давид Луиз (29.), Бранислав Ивановиќ (34.), Лампард (59.), Рамиреш (75. и 89.), Оскар (79. од пенал) и Азар (83.) го торпедираа младиот состав на Пол Ламберт, кој само пред една седмица славеше со 3:1 во Ливерпул.
Резервниот играч на Челзи, Лукас Пјазон, го замени Хуан Мата во 74. минута и во финишот изведе пенал, но Бред Гузан му го одбрани неколку минути пред Рамиреш да стави точка на голеадата. Гузан веројатно беше виновен за голот на Рамиреш, но голманот на Астон Вила е заслужен што тимот на Рафаел Бенитез не оствари двоцифрена победа, со оглед на тоа што неговите играчи „кампува“ на гостинската половина.
Куриозитет е дека не беше покажан ниту еден картон на натпреварот. Покрај покажаното од Гузман, Вила имаше неколку позитивни нешта во кошмарното попладне, во кое Кристијан Бентеке потроши поголем дел од мечот во офсајд. Голманот на Челзи, Петр Чех, го насочи ударот на Андреас Вајман во гредата и преку голот, но тоа беше се' од гостите, чија серија од пет средби без пораз беше брутално прекината од „сините“.
Челзи е трет на табелата, со три бода повеќе од Арсенал, а Астон Вила е 16. и има три поена повеќе од Саутемптон.
|
