24.12.2012, 13:44 Фергусон: Ван Перси можеше да загине
Менаџерот на Манчестер јунајтед бесен по ремито 1:1 кај Свонси
Менаџерот на Манчестер јунајтед и' порача на Фудбалската асоцијација на Англија да не затвора очи, туку да го казни одбранбениот фудбалер на Свонси Ешли Вилијамс поради намерно удирање на Ван Перси со топка. Инцидентот се случи во 74. минута на натпреварот меѓу Свонси и Јунајтед кога судијата досуди слободен удар по старт врз Ван Перси, а Вилијамс со сета сила ја шутна топката која заврши во главата на Холанѓанецот. Потоа настана турканица меѓу фудбалерите вклучувајќи ги Вилијамс и Ван Перси, а судијата ја реши ситуацијата со тоа што им додели жолти картони на двајцата.
„Тоа беше најопасното нешто што сум го видел на фудбалските терени. Играта беше прекината, а Вилијамс реагираше во бес и тоа пред судијата. Можеше да му го скрши вратот, да го убие Ван Перси. Искрено мислам дека играчот на Свонси мора да добие суспензија на подолго време“, изјави Фергусон.
Правилата велат дека ФА може да го гони Вилијамс ако судијата Мајкл Оливер потврди дека не го санкционирал или не го видел инцидентот. Со оглед дека арбитарот веќе подели жолти картони, ситуацијата е разрешена.
„Фергусон по натпреварот рече дека сум можел да го убијам Ван Перси, но тоа е негово мислење. Секој може да каже што мисли, меѓутоа јас уште на теренот пробав да се извинам, но ситуацијата ескалираше пред да го сторам тоа. Ја шутнав топката како знак на фрустрација, но не сакав да го погодам во глава. Разбирам зошто Ван Перси се налути, истото би го сторил и јас ако ми се случеше тоа“, изјави Вилијамс, кој доби подршка од неговите соиграчи, но и од играчи од Јунајтед, како Вејн Руни.
„Мислам дека не сакаше да го погоди во главата. Судијата добро ја разреши ситуацијата“, вели Руни.
Менаџерот на Свонси, Михаел Лаудруп, вели дека инцидентот е случаен, а не намерен и дека вакви ситуации се присутни на натпреварите.
„Имаше многу фудбалери во шеснаесетникот и не можев добро да ја видам ситуацијата. Ја прегледав снимката и заклучив дека Ферги претерува со изјавата. Такви работи се случуваат на фудбалските терени“, изјави Лаудруп.
|
