Попов асистираше за триумф на ВБА

Македонскиот интернационалец имаше главна улога во триумфот на Вест Бромович над Норич 2:1

Македонскиот интернационалец Горан Попов одигра уште една одлична партија во дресот на Вест Бромвич Албион во Премиер-лигата, носејќи ја клучната улога во триумфот на неговиот тим со 2:1 против тимот на Норич.

По четири едноподруго натпревари без победа, во 18. коло од англискиот шампионат ВБА, конечно, победи и тоа благодарение на голот на Лукаку во 82. минута од средбата, а по асистенција на Попов. Нашиот левокрилен дефанзивец одлично нафрли од околу 40 метри од левата страна, а Лукаку беше највисок во скокот и со прецизен удар со глава ги обезбеди трите бода за тимот од Бирмингем. Претходно гостите поведоа преку Снудграс во 23 минута од натпреварот, а израмни Гера во 44. минута.

Горан Попов од страна на медиумите на Островот повторно беше прогласен за играч на натпреварот, заедно со Лукаку со највисоки оценки во својот тим. По овој триумф ВБА со 30 бода на своето конто се врати на делба на 3. место на табелата, веднаш зад екипите од Манчестер.

Фудбалерите на Манчестер Сити дури во последните моменти ја начнаа мрежата на Рединг за победа со 1:0 и приближување до водечкиот Јунајтед за три бода. Стрелец на единствениот погодок на „Етихад“ беше Герет Бери во третата минута од судиското продолжение. Дотогаш составот на Роберто Манчини доминираше на теренот, но ниту еден од 15 удари не заврши во целта.

Лоша среќа имаше Тотенхем во дуелот со Стоук на „Вајт харт лејн“. Домашните покажаа заби во 15. минути од натпреварот за потоа да се ориентираат на одбрана и храбро да одржуваат реми. Киксот на спарси го искористи екипата на Евертон, која со победата кај Вест Хем со 2:1 се искачи на петтата позиција на табелата.

Предводен од Стјуарт Даунинг, Ливерпул имаше инспиративна претстава против Фулам. Црвените славеа на „Енфилд“ со 4:0 и стигнаа до четвртото место на табелата.

Премиер-лига, 18. коло

Резултати: Виган - Арсенал 0:1, Саутемптон - Сандерленд 0:1, ВБА - Норич 2:1, Тотенхем - Стоук 0:0, Њукасл - КПР 1:0, Манчестер Сити - Рединг 1:0, Вест Хем - Евертон 1:2, Ливерпул - Фулам 4:0. Вчера играа: Свонси - Манчестер јунајтед, Челзи - Астон Вила.

Табела: Манчестер јунајтед 42 (-1), Манчестер Сити 39, Арсенал 30, Евертон 30, Тотенхем 30, ВБА 30, Челзи 29 (-2), Ливерпул 25, Стоук 25, Норич 25, Свонси 23 (-1), Вест Хем 23, Фулам 20, Њукасл 20, Сандерленд 19, Астон Вила 18 (-1), Саутемптон 15 (-1), Виган 15, КПР 10, Рединг 9.