СМК со резерви дека Грција ќе ги штити човековите права во ЕУ

Oд оваа организација ќе побараат од Ламбринидис на Парламентот на Грција да му препорача да ја ратификува Kонвенцијата за заштита на националните малцинства од СЕ

Светскиот македонски конгрес (СМК) го поздравува назначувањето на Специјален претставник на Европската унија за човекови права, но изразува резерви за именувањето на Ставрос Ламбринидис, поранешен шеф на грчката дипломатија и европратеник за прв функционер на таа позиција, затоа што потекнува од земја во која, според СМК, човековите и малцинските права не се признаваат туку се дискриминираат.

- СМК ќе ги користи механизмите на Специјалниот претставник на ЕУ за човекови права, а од Ставрос Ламбринидис ќе побара да ја принуди Република Грција на почитување на препораките и заложбата за почитување на правата на Македонците по потекло во Грција, како и правата на насилно прогонетите Македонци од Балканските војни 1912-1913 година и од Граѓанската војна во Грција 1946-1949 година во согласност со Извештајот на Геј Мекдугал, специјален претставник на Генералниот секретар на ОН за човекови права, кој се однесува на состојбата на Македонците по потекло во Грција, направен по нарачка на Генералниот секретар на ОН во 2008 година, се вели во реакцијата од СМК.

Воедно, од оваа организација ќе побараат од Ламбринидис на Парламентот на Република Грција да му препорача да ја ратификува Рамковната конвенција за заштита на националните малцинства од Советот на Европа, потпишана на 22 септември 1997 година, да и препорача на Владата во Атина да ги поништи дискриминаторските закони кон насилно прогонетите Македонци од Република Грција од Балканските војни и од Граѓанската војна во Грција, посебно министерската одлука од 1982 година со којашто се одредува дека слободни се да се вратат во Грција само “Грците по род“ и дискриминаторскиот Закон од 1985 кој дозволува враќање на конфискуваниот имот само на “Грците по род“.

Меѓу барањата на СМК до специјалниот претставник на ЕУ за човековите права, се и да ја натера Владата на Грција да ги испочитува пресудите на Европскиот суд за човекови права на здруженијата на Македонците по потекло да им дозволи да го користат зборот „македонски” во своите имиња и слободно да ја изразуваат својата етничка припадност и нивна официјална регистрација, како и да ја принуди Атина да ги почитува правата и слободите на Македонците по потекло според Декларацијата за малцинствата, Универзалната декларација за човекови права и основните меѓународни договори за човекови прав��.