Митинг на СДСМ во Охрид

СДСМ синоќа одржа митинг во Охрид, на кој беше јавно објавена кандидатурата на Александар Петрески за негов реизбор на градоначалничката функција на престојните локални избори.

Партискиот лидер Бранко Црвенковски во обраќањето пред охриѓани истакна дека големиот број граѓани на митинзите на СДСМ се потврда дека народот веќе го победил стравот, дека се прочитани лагите на актуелната власт.

- Доаѓа време за наплата на сметките, за народна казна за сите досегашни лаги и измами, понижувања и крадења, казна што ќе ја изречат обесправените, излажаните, страдните, рече Црвенковски.

Тој истакна дека престојните локални избори се референдум за тоа дали ќе ја биде или не Македонија.

- Македонија е земја со големи проблеми, со сиромашни ресурси, со сложени и чувствителни структури на населението... Таква земја нема капацитет премногу долго да издржи погрешни политики за клучните прашања, рече меѓу другото лидерот на СДСМ.

Кандидатот за градоначалник на Охрид, Александар Петрески истакна дека во текот на неговите два досегашни градоначалнички мандати направил повеќе отколку сите досегашни градоначалници од редовите на ВМРО-ДПМНЕ заедно.

- Вашите градоначалници го направија колекторот кој не функционираше, јас го доизградив, го ставив во функција и целосно го исплатив од прв до последен денар, заедно со огромните затезни камати, вашите градоначалници ја направија спортската сала, јас го зголемив нејзиниот капацитет за нови петстотини седишта и јас ја платив од прв до последен денар, заедно со огромните камати. Изградивме колекторска примарна и секундарна мрежа на потегот Лагадин-Пештани, во должина од шест километри, со две нови пумпни станици, со што сите туристички населби од овој дел, конечно, добија канализација и конечно го заштитивме Езерото, што, патем, да Ве потсетиме, е законска обврска на централната власт, рече меѓу другото Петрески.

Тој ја обвини централната власт дека три години го оставила Охрид без болница, дека ја затвориле единствената детска болница на Балканот, го уништила ЕМО, Охрид го оставила последен, заедно со Арачиново, да влезе во втората фаза од децентрализацијата, ги суспендирала законите за локална самоуправа, за градежно земјиште и за урбано планирање.