Херитиџ предвидува македонско членство во НАТО на следниот самит

Фондацијата Херитиџ е еден од водечките аналитички центри на американската десница, главно активен во прашањата на безбедноста и економските слободи

Американската фондација Херитиџ, која во пресрет на самитот на НАТО во Чикаго беше една од најактивните за поддршката на македонското членство, вчера во Вашингтон организираше конференција за состојбите во Jугоисточна Европа на која експертите на Херитиџ оценија дека Македонија ќе стане членка на следниот самит на НАТО.

- Многу беше разочарувачки што Македонија не го доби своето тешко заработено членство во НАТО на самитот во Чикаго. Да бидеме искрени, Грците имаат поважни работи за кои треба да се грижат од името на Република Македонија. Ова прашање е единственото нешто што го попречува членството на Македонија во НАТО, и Грците кои сега се зависни од милоста на Европа, би требало и самите да ги поддржат своите соседи. Државниот секретар Хилари Клинтон изрази надеж дека Чикаго ќе биде последен самит на НАТО без проширување. Лично, јас сметам дека Македонија би требала да стане членка на НАТО уште утре, но реално, тоа најверојатно ќе се случи веќе на следниот самит на НАТО, изјави аналитичарот Лук Кофи, кој пред самитот во Чикаго беше коавтор на труд на Херитиџ со кој повика Македонија да добие покана за членство.

- Сметаме дека самитот во Чикаго требаше да биде самит за проширување. На крајот, тој се сведе на самит за спроведување на претходно донесените одлуки од Лисабон. Но, со нашите иницијативи, со нашите средби на Капитол Хил, во Стејт департментот, во секретаријатот за одбрана, работевме проширувањето на НАТО да остане актуелно како тема за следниот самит, додава Џо Фоли, кој ги промовира ставовите на повеќе балкански држави во Вашингтон.

Фондацијата Херитиџ е еден од водечките аналитички центри на американската десница, главно активен во прашањата на безбедноста и економските слободи. Џејмс Дин, заменик директор на програмата за владини истражувања на Херитиџ, оцени дека земјите од регионот на Балканот меѓу кои и Македонија се позитивен пример токму во областа на спроведените реформи и привлекувањето на странски инвестиции.

- Во моментов, во оваа светска економска клима, инвеститорите бараат добри места каде би ги вложиле своите пари, бидејќи гледаме дека многу места веќе не се поволни за инвестирање. Вo изминатите десет години многу од државите од Југоисточна Европа постигнаа извонреден напредок во економските слободи. Земји како Хрватска, Македонија, Бугар��ја, Србија направија многу забележителен напредок. Веруваме дека има многу добри вести од Балканот за инвеститорите, изјави Дин, кој додаде дека фондацијата Херитиџ ја промовира потреба да се воведе и процес на визно олеснување за земјите од регионот, со кое граѓаните би можеле да престојуваат до 90 дена во САД, без претходно да извадат виза.

Херитиџ организираше средба на коалицијата за Jугоисточна Европа, која ги поврзува дијаспорите на повеќе балкански држави во Соединетите Американски Држави, меѓу кои и Обединетата македонска дијаспора, од каде најавија заеднички бизнис форум за целиот регион, кој ќе се организира во САД.

Интеграциите на Македонија и Балканот во целина биле тема на разговор и при посетата на словачкиот министер за надворешни работи Мирослав Лајчак на Вашингтон. Словачкото министерство за надворешни работи кусо информира дека на средбата на Лајчак со американскиот државен секретар Хилари Клинтон, таа ја поздравила улогата на Словачка во Западниот Балкан. Лајчак, заедно со австрискиот колега Михаел Шпинделегер, при нивната неодамнешна посета на Македонија изјавија дека спорот за името веќе не смее да ги блокира македонските интеграции во НАТО и во Европската Унија.

- На мојата средба со министерот Лајчак во Вашингтон јас силно ја поддржав интеграцијата на Западниот Балкан во НАТО и во Европската Унија, и брзото решавање на прашањето на името. Останувам загрижен дека, доколку нема напредок во процесот на интеграциите, политичката и економската состојба во Македонија може да бидат изложени на дополнителен притисок, изјави за МИА Дејмон Вилсон, извршен директор на Атланскиот Совет на САД, поранешен висок функционер во американскиот Совет за национална безбедност и во кабинетот на генералниот секретар на НАТО Џорџ Робертсон.