Јапонија запре уште еден нуклеарен реактор

Во Јапонија денеска беше затворен уште еден нуклеарен реактор, при што во земјата сега активен останува само еден нуклеарен енергетски блок.

Се очекува последниот активен реактор да биде затворен на почетокот на мај, што може да доведе до недостиг на електрична енергија во текот на летото, кога ќе се зголеми потрошувачката на струја.

Јапонија има 54 реактори. Тие се исклучуваат на секои 13 месеци заради редовни проверки. По нуклеарната криза во Фукушима и опасностите кои произлегоа од неа во однос на безбедноста властите не вклучија повторно ниту еден од реакторите, запрени за редовни проверки, ниту од тие кои веќе беа исклучени поради несреќата.

Засега останува нејасно кога Јапонија може повторно да ги пушти во употреба затворените реактори. Јапонија пред кризата една третина од електричната енергија ја добиваше од нуклеарните централи. Владата сака да ги вклучи реакторите, откако по проверките ќе се утврди дека тие се целосно безбедни, но на ова се противи голем дел од јавноста.