Љупчо и Љубе се смирија

Од денеска официјално почнуваат работните средби на раководствата на ВМРО-Народна и на ОМ за коалицирање

Љубе Бошкоски и на Љупчо Георгиевски ги потиснаа несогласувањата што се појавија меѓу нив по претседателските и локалните избори во 2009 година. Во очекување на новите локални избори, привременото раководство на Обединети за Македонија донесе одлука за коалиција со ВМРО-Народна на Љупчо Георгиевски, а веќе денеска и официјално почнуваат работните средби на раководствата на двете партии, кои и официјално ја потврдуваат коалицијата.

Во ВМРО-Народна велат дека коалицијата за нив е прифатлива и дека е резултат на претходните средби со ОМ. Пред извесно време беше најавена соработка и меѓу ВМРО-Народна и ЛДП, а за вчера беше закажана и средба со раководството на Достоинство, кои сакале да соработуваат со партијата на Георгиевски.

„ОМ на седница на Централниот комитет ја донесоа одлуката за коалиција со нас, што ние го прифаќаме. Затоа за денеска закажавме средба, на која би ги дефинирале основните принципи на соработка“, ни изјави Љупчо Балковски, генерален секретар на ВМРО-Народна. Тој посочува дека одлуката за коалиција следи по соработката меѓу двете партии, но ја негира можноста за претопување на членството на ОМ во ВМРО-Народна.

„Во ова време мора да имаме соработка. Со ОМ и со ЛДП најдовме заеднички јазик околу прашањата за демократија, НАТО и ЕУ. Тие се доволни и многу важни точки за да почнеме соработка“, појаснува Балковски. Според него, барањата на партиите за соработка со ВМРО-Народна се резултат на доаѓањето на Георгиевски на чело на партијата, што предизвикало реакција кај десницата и кај партиите од центарот.

„Конечно, партиите почнуваат да соработуваат меѓу себе, а претходно не ни разговараа. Претходно договоривме соработка со ЛДП, а сега ќе се сретнеме и со Достоинство за да видиме како размислуваат“, коментира генералниот секретар на Народна. Тој вели дека е прерано да се зборува за формирање блок, бидејќи сега само се договара соработка, а евентуалната коалиција би се договарала подоцна. (Ж.Х.З.)