Меркел сама против сите на Самитот на Г-20 во Лос Кабос

Ангела Меркел покажува железна одлучност за мерките за штедење и се наоѓа под најголем притисок досега

Во мексиканското туристичко место Лос Кабос, каде се одржува самитот на земјите од Групата 20 (Г-20) најразвиени земји и држави со забрзан развој, кои претставуваат 85 проценти од глобалната економија и каде се дискутира за зголемување на економскиот раст, инвестициите и спас на еврото, моментално односот на силите е 19 спрема 1, оценуваат германските аналитичари.

„Сите против една и една против сите“, е слоган што најдобро ја објаснува позицијата на германската канцеларка Ангела Меркел, која и понатаму покажува железна одлучност кога станува збор за мерките за штедење, а според медиумите се наоѓа под најголем притисок досега.

САД и Франција сакаат да ја „омекнат“, но таа, најверојатно нема намера да попушти, коментираат набљудувачите на самитот.

Меркел нема лесна задача, што не е никаво чудо, бидејќи во Лос Кабос таа нема да се сретне, како во Брисел со „сиромашните европски роднини“, туку со најважните светски лидери.

Без оглед дали станува збор за кинескиот претседател, индискиот премиер или американскиот претседател, сите тие сакаат Германија конечно да го реши прашањето со кризата во еврозоната, истакнуваат аналитичарите.